Salah a chhuak dawn lo - Klopp

Al Ittihad chuan pound maktaduai 150-in Mohamed Salah lakluh an tum a, Reds hian he dawrna hi hnar tawh mah se Saudi Pro League club hian £200mtd-a lakluh an tum nawn dawn nia sawi a ni.

Mahse, Liverpool boss Jurgen Klopp chuan an player hi a rinawm thu sawiin, "He club tana a inpeknaah hian rinhlelhna tur ka nei lo. Salah chungchang thu hi an sawi nasa êm êm a, mahse, chu chuan min tibuai lo.

"Kan player a ni a, he hmuna châm zel hi a duh a ni," a ti - Salah hian kum 2017 khan Liverpool hi zawmin, Reds-ah hian season khatah goal 23 khung tlin loh a nei ngai lo.

Merseyside club tan hian nomawi chawi theih a chawi kim tawh a, match 309 a khelhsakah goal 188 khungin, assist vawi 81 a nei tawh. Tun season-a match li an khelh tawhah goal hnih khungin, assist vawi hnih a nei leh der tawh bawk.

Klopp chuan, "A statistic hi en ula, a awihawm lo zawk hial a ni. Zanin match-ah pawh Aston Villa tih loh thil dang ngaihtuah miah lo ang mai khan a khel thei a, goal zawng zawngah khan a inrawlh vek a ni," a ti.

Liverpool midfielder Dominik Szoboszlai chuan, "Football a ni tlat a, an sawi luai luai mai a ni. Liverpool-a a châm hi kan lawm hle - kan titi ho fo a, he hmuna châm a, khelh zel hi a duh avangin kan lawm a, kan mamawh êm êm bawk a ni," a ti a, Reds fan-ten hriat nuam an ti ang.