Premier League khelh ṭan theih a ni dawn em? Covid-19 test-ah paruk positive
Premier League chuan May 19 khan thuchhuah an siam a, player leh club staff mi 748 ten May 17-18 khan Covid-19 test neiin club pathum aṭangin mi paruk an positive.
Player leh staff positive parukte hi ni sarih chhung an awm hrang dawn. Premier League thuneitute chuan positive-te hi an hming leh club an puangzar dawn lo. Test thawhkhatnaa test hmachhawn hi club 19 an ni a, Norwich City-in May 19 khan test an nei ve chauh.
Tute nge positive?
Premier League-in official-in puangzar lo mah se Burnley-in an zep lo. Mi paruk zinga pakhat chu Burnley assistant manager Ian Woan a ni a, Watford player pahnih leh staff pakhat an positive bawk. Mi pahnih dang hi club pakhat aṭangin a ni a, he club hi puanzar a ni lo.
Burnley chuan, "Club-in Covid-19 test a neih zing aṭangin assistant manager Ian Woan-a'n Covid-19 a vei tih hmuhchhuah a ni tih kan nemnghet a. Ian hi a dinhmun a ṭha a, Covid-19 natna a lang chhuak lo a, club-in a ngaihtuah zui zel ang. Natna laka fihlim veleh training a zawm ang," tiin thuchhuah an siam.
Ian Woan hi kum 52 mi a ni a, Manchester United leh Manchester City youth academy-ah awm ve ve tawhin hemi hnu hian club hrang hrangah a khel kual. Club 11 a khelh tawhnaah Nottingham Forest a langsar a, football khelh a chawlhsan hnuin Portsmouth (caretaker), Watford leh Burnley (assistant manager) ah club enkawl hna a thawk.
99.20% negative
Mi paruk positive hi langsar viau mah se thlirna dangah chuan positive percentage hi 1% pawh a tling lo a, a negative zat hi 99% a tling. Premier League ṭan theih beiseitute tan chuan tuna negative zat hi a 'positive' -inelna ṭan theih an beisei chhunzawm zel ang.
Norwich City-in test an la neih ve loh chhan hi head coach Daniel Farke leh German player-te'n England an la thlen loh vang a ni a, Canaries-ah hian German player pasarih an awm. Test thawhkhatna aṭanga thlir chuan Premier League tih tawpna tur em chuan positive an la tam tawk lo a, 'Project Restart' hlawhtlinna kawng sialtuah a ngaih theih zawk.
Chutihrualin Premier League club te hian vawiin leh naktuk hian test thawhhnihna an nei leh dawn a, hemi result hi Inrinni chawhnu lamah a chhuah beisei a ni.