AFC Asian Cup Under-23: Terina & Ayush telna India vawiinah inlan dawn
Kum 23 hnuai lam, Asian football-a ram leh ram inelna sang ber AFC Asian Cup 2024 khel tur zawnnaah India chu vawiin hian an inlan ṭan dawn a, chawhnu dar 2:00 hian Maldives nen an inkhel ang.
India squad-ah hian Mizoram player pahnih Lalrinliana Hnamte (Terina) leh Ayush Chhetri te an tel a, coach Clifford Miranda kaihhruaina hnuaiah hmun an chang phak dawn em, tih chu kan hre thuai dawn.
Blue Tigers hi group G-ah awmin, Maldives bakah United Arab Emirates leh China te nen an awm ho a, India tan qualify turin match hmasa bera Maldives hneh a pawimawh dawn - a hmuaktu team pahnih dang an hrawl tlat!
A kalphung
April - May, 2024-a khelh tur Asian Cup U23 hi Qatar chuan a thleng dawn a, team 16 inelna tur niin, inelna thlengtu Qatar chu a tling chiang sa an ni - chumi awmzia chu hmun ruak 15 a la awm a, team 41-in he hmun ruak hi an inchuh leh ang.
Qatar-in tling chiang tawh mah se qualifier an khel ve dawn a, mahse, anni match erawh friendly match anga chhiar tur niin, an result-in awmzia a nei lo ang. Qatar chhiar tel a nih avangin team 42-in qualifier an hmachhawn dawn tihna a ni a, North Korea erawh an inhnukdawk thung.
Team 42 hi group 11-ah ṭhen hran an ni. Group pakuaah team pali zel awmin, group pahnihah team pathum ve ve an awm thung. Group tina a sang ber chu Asian Cup U23 khel turin an tling ang a, pahnihna tiṭha zual pali an tling dawn bawk.
India buaina
Blue Tigers hian Thawhṭanni zan khan qualifier khelhna tur hmun China an thleng ve chauh a, hei hi Indian club ṭhenkhatin player an chhuah lawk duh loh vang a ni - nimin khan training an nei nghal a, vawiinah an inlan nghal dawn!
India U23-te hi ruahman dan chuan August 12-ah khan training ṭan tur an ni. Mahse, ISL club-ten Durand Cup an khelh bakah, Asian football-a inelna hmachhawn an awm avangin AIFF nen inbiak hnuah sawn a ni a, August 20 khan camp neih tura tih a ni.
Heti chung hian club ṭhenkhat chuan August 28 thleng khan player an la chhuah thei lo a, hetihlaia player chhuah thei lo langsar zingah East Bengal, Kerala Blasters, Mumbai City FC, Jamshedpur FC, Odisha FC leh Punjab FC an tel - vawiinah an inkhelh zui a ngai dawn!
Terina rinna
India-in beisei angin training-na nei ho thei lo mah se Bagan midfielder Terina chuan beiseina an neih san thu a sawi a, India hi Asian Cup U23 khel tura hruai thlen theih ngei a inbeisei.
Terina chuan, "A phurawm tawh ka ti a, beisei anga kan khel chhuak thei a nih ngat chuan chance kan nei ṭhain ka hria," tiin Vanglaini a hralh a, UAE leh China an hlauh bik loh thu a sawi.
Chanmari chher chhuah, Dungtlang tlangval Terina hian Indian football-ah season a la hmang rei lo - season hnih chauh ISL-ah a la khel a, East Bengal leh Mohun Bagan tan a khel. Mahse, khelmualah a chet ṭhat ṭhin avangin Indian midfielder beiseiawm ber zinga mi a ni mek.
Ayush-a beiseina
Dinthar tlangval Ayush-a'n Aizawl FC aṭanga a hming chher ṭanin, season hmasa khan FC Goa a zawm ve chauh - mahse, Ayush-a thiamna hmuh hmaihin a awm lo a, ISL-a a season hmasa berah match 20 a khel kim vek!
Tunah chuan India U23 tana inlan tur hialin koh a ni ta a, Ayush-a'n a hming chher zel a beisei. Aizawl FC midfielder hlui chuan, "Kan huphurh hran lo a, Asian Cup khel tura kan inpettlin theih kan beisei.
"Player pawh kan ṭha rual a, chutihrual chuan club ṭhenkhatin player an release lawk loh avangin duh angin kan khel ho tam tawk lo," tiin Vanglaini a hrilh a, India-in Asian Cup an khelh ngei a beisei.