Project Veng FC 1 - 1 Mizoram Police; Police-in referee duhsakna an dawng - Project Veng FC coach

Zote Toyota MPL10-ah nimin khan Mizoram Police FC leh kai thar Project Veng FC te 1-1 in an inhnehtawk a, Lalbiaksanga Colney enkawl Police hi a draw-tu zawk an ni.

MPL10 round 3 khelh zawh a ni ta a, Chanmari FC chauh vawi thuma vawi thum chak thei an awm. Round 3-ah hian round hmasa pahniha point hmu lo Project Veng, Venghnuai leh Electric Veng ten point an rawn hmu vek a, MPL10 a nung sawt.

Coach ṭha nei

MPL kai thar Project Veng FC-in Kolasib aṭangin inelna an hmachhawn a, club dang zawng aiin an hna a hautak. I Day Football-ah match thum khelin point khat pawh an hlawh chhuak lo a, MPL10 match hmasa berah Chawnpui lakah 4-1 ngawtin an tlawm.

Project coach-te an match khelh tawh aṭangin an inzir a, MPL club dang aia player tawnhriat nei an neih tlem avangin MPL10 match hnihna aṭangin goal venhim an ngai pawimawh. Chanmari lakah Project Veng hi tlawm mah se an chak lohna hi goal khat chauh a ni.

Head coach R. Lalrammawia (Patea) leh coach Lalruatfela ten an player-te milin game plan an siam a, Chanmari laka game ṭha tak an khelh hnuah Mizoram Police lakah game awmze nei tak an khel leh bawk. Project Veng hian MPL10-ah point an hmu a ni ringawt lo a, vanduai lo se point thum hmu thei tur an ni.

A hmuhnawm

Police-in an training-na hmun 1st Bn MAP Ground-ah Project Veng an mikhual a, chak tura rinkai zawk ni mah se inkhelah an chungnung thei lo. Kolasib club player-te an tlan tam zawk a, team nem zawka ngaih ni mah se inkhelah an chungnung zawk.

Minute 30-naah Kolasib club-in mawi zetin Police tlarhnung an ṭhiat a, MS Dawngzuala cross chu captain Andy Lalrinpuia'n awlsam takin a khung. Project Veng hi goal an khung hnuah an inthlahdah phah lo.

Amaherawhchu an khingpui Police an ni miau a, na takin Kolasib club an nawr let. Police hi handball vanga an penalty beisei pek an ni lo a, Jack Lianlalmawia'n ṭul lo zetin penalty a chawi. Lalbiakhlua (Hlutea) a rawn pen chhuak a, goal ban a pet per.

Project Veng lamin halftime an hmang ṭha a, goal an venhim ṭhat bakah an goal bawh a na sawt. Bench aṭanga rawn lut Lalfamkima (FK-a) chu Police tlarhnung tan a hnawksak a, inkhel bul ṭantu zinga mi Jeho Laltlansanga pawh a che ṭha - vanneih ṭum ni se goal hnih khung thei a ni.

Police striker Malsawmfela khel chhe lo mah se thlawptu a nei ṭha tawk lo a, tlarhmaah a mal hret avangin a hlauhawm thei lo. Chutihrualin hnai tak aṭangin Sawmfela'n crossbar a pet per. Lalnunsanga (Talea) leh F. Lallawmkima te luh hnuah Police goal bawh a na sawt a, Talea leh Lawma te hian goal an khung teuh hle.

A tawpah Police an vannei a, defender khel ṭha Lalmawizuala'n Lalbiakhlua (Biaktea) ball la lut tur chu pet sawnsak mah se Police winger hi a ti tlu tel. Police-in referee duhsakna dawngin penalty an hmu a, man of the match-a thlan H. Lalbiakthanga'n penalty aṭangin injury time-ah si phurh a sut.

Police an ṭan

Project Veng assistant coach Lalruatfela chuan, "Police hian penalty an hmu thei khawp mai. I Day Football-ah pawh khan penalty an hmu ngun a, kan lakah vawi hnih an hmu - tun ṭumah pawh vawi hnih an hmu leh. Referee-te hian an hlau ṭhinin ka hria. Penalty kan chawi hmasak kha chu kan defender-te tihsual a ni a, a vawi hnihna kha chu penalty tur a ni lo," tiin referee thutluknaah a lawm lo.

Police coach Lalbiaksanga Colney chuan, "Penalty hmasa zawk kha chu thun ila, awlsam takin kan chak ang. Kan khung tak si loah chuan a harsa ta deuh a ni," tiin Vanglaini a hrilh ve bawk.