Mizoramin Jharkhand an hneh lo

Hero Junior Boys' National Football Championship for Dr BC Roy Trophy 2023-24-ah Mizoram chuan nimin khan Jharkhand chu 5-2 in an hneh lo. Group A-ah Mizoram hi Karnataka, Jharkhand leh Maharashtra te nen an awm ho a, team khat chauhin semifinal an luh dawn avangin Mizoram tan beisei a tlem ta hle.

Bhubaneswar, Odisha-a inelna neihah nimin khan Mizoramin match hmasa ber an khel a, beisei angin bul an ṭan lo. Jharkhand tana khel Mizo rawlthar Lawmsangzuala'n minute 12-na lekah a khung.

James Thongmin Chongloi hmangin Jharkhand-in an khung belh a, minute 30-naah 2-0 a ni der. Mizoram beiseina siam turin Lalrinfela'n first half hmain si phurh a sut ṭhen. Mahse, second half ṭan chiahah James-a'n Jharkhand tan a khung leh a, ani hian hattrick a siam zui.

Mizoramin Eddie Lalhmangaihzuala hmangin khung ve bawk mah se scoreline a timawi pha lo. Jharkhand-in goal an khung belh a, hun a tawp meuh chuan 5-2 a ni.

Mizoram hian Maharashtra (September 7) leh Karnataka (September 9) te an la hmachhawn dawn a, an chak ve ve a nih pawhin semifinal lut tur chuan Jharkhand an chetsual a ṭul ang.