Venghnuaiin Aizawl FC an chelh

Zote Toyota MPL10-ah FC Venghnuai chuan nimin khan I League club Aizawl FC an chelh a, 1-1 in an inhnehtawk. AFC-in match thum khelh aṭangin point nga an hlawh chhuak a, Venghnuaiin a vawi khat nan point an hmu ve bawk.

MPL9 semifinal-ah khan Venghnuaiin Aizawl FC hnehin final an lut a, MPL10-ah pawh an la ngam chhunzawm zel. Inkhelhna hmun hi 1st Bn MAP Ground, Armed Veng a nih avangin result danglam deuh awm hi a mak hran lo.

Aizawl FC coach Victor Lalbiakmawia a awm lo a, coach B. Malsawmzuala'n a ho. I League club-in bul an ṭan ṭha a, minute kuanaah Lalrinzuala'n a khung. Chhinga Veng aṭanga AFC zawmtu Serchhip tlangval hian I League club-ah pawh a thiamna a pholang zel.

FC Venghnuai hi goal an chhuah avangin an hnual lo a, captain C. Ramdinmawia hoin an insiamrem. Minute 23-naah Venghnuaiin AFC tlarhnung ball inpek ṭhat tawk loh an hmang ṭangkai a, Eric Remruatpuia Chhangte-in si phurh a sut. Serchhip tlangval ve vein goal an khung.

Aizawl FC-in goal khung tumin na takin an nawr a, Lalbiakdika leh Ramdinthara ten hun ṭha an hlah. Second half-ah I League club hian na zawka an nawr a rinawm a, rin ang ngawt a ni lo.

Ramdina'n Venghnuai tlarhnung a ho ṭha a, AFC tlarhmaa awm Rinzuala, BD-a leh Tharpuia te an che thei lo. Bench aṭanga rawn lut Rohmingthanga Bawlte leh Augustine Lalrochana te pawhin danglamna an thlen lo.

Venghnuaiin chak theihna hun ṭha an nei zawk a, C. Ngurnuntluanga ball pet kawh ṭha zet chuan crossbar a per dawt. Bench aṭanga rawn lut Mahruaia'n chance ṭha insiam theihna tur a nei a, goal hmaah a hriam tawk lo.

Minute 90 chhungin chak zawk an awm lo a, Aizawl FC-in chak an phu bik lo. I League club hi an squad a chhah ṭha a, hei hi an ṭhatna ni loin an chhiatna a ni thei tho. AFC-in player an siksawi nasat avangin player ṭhenkhatin inrintawkna nei turin minute an ngah tawk lo.

Round 3

Nimin Inkhel Results

FC Venghnuai 1 - 1 Aizawl FC

FCV : Eric Remruatpuia Chhangte 23'
AFC : Lalrinzuala 9'

MoM : C Ramdinmawia, FCV