Kolkata football titi luahtu Mizo tlangval David

Durand Cup 2023 khelh zawh a ni a, India rama club football inelna ngaihhlut hlawha top scorer chu Mizo tlangval David Lalhlansanga a ni - Mohammedan Sporting Club striker hian tun season inelna hrang hrangah match 16 khelin goal 20 zet a khung tawh!

David-a hi tun season Durand Cup-ah match thum khela goal ruk khungin top scorer a ni a, knockout round-ah a team luhpui thei lo mah se golden boot chawimawina nen a haw - Aizawl FC striker hlui hian goal khung tam ber nih manah cheng nuai thum a dawng.

FC Goa forward Noah Sadaoui chuan goal ruk khung ve tho mah se David hian goal a khung tam zawk avangin golden boot hi hlan a ni a, nikum khan Mizo tlangval Lallianzuala Chhangte chuan goal sarih khungin Durand Cup top scorer a lo ni tawh bawk.

Aizawl - Kolkata

Aizawl FC academy chhuak David-a hian tun season-a Mohammedan a zawm hma hian phai club tan a la khel ngai lo. Aizawl FC academy aṭanga bul ṭanin, Mizo club-ah hian kum hnih a inzir hnuah contract a ziak.

Mahse, AFC-ah pawh beisei angin thil a awlsam nghal ngawt bik lo. I League club-ah David hian kum li hun a hmang a, a season hmasa kum hnih chu a inlan meuh lo - a season thumnaah bench aṭangin a lut ve ṭan a, season hmasa khan hmun pawimawh a chang ṭan.

Aizawl FC tan hian 2022-23 season-ah match 13 khelin goal thum a khung a, assist vawi hnih a nei. Mizo club-in chelh an tum mek laiin Vairengte tlangval hian Vairengte pela sawmna a hmu a, Kolkata club hlun Mohammedan nen an inbe fel.

Hriat hlawh lo val

David-a'n tawnhriat a la ngah tawk lo tih inhre chungin, huaisen takin Mohammedan a zawm a, a tirah chuan beisei angin thil a kal nghal bik lo. Pre-season friendly match-a an match hmasa berah bench-ah dah a ni.

Mahse, "Keinin vanduainaa kan ruat..." tih hla ang maiin Mohammedan player pakhat a inhliam a, bench aṭangin David-a hi a lut a, goal a khung nghal. Friendly match vawi hnihnaah an luhtir leh a, chakna goal a khung lehnghal!

Hetihlaia Mohammedan coach Mehrajuddin Wadoo-a'n David-a chungah rinna a nghat a, friendly match hniha goal a khung hnuah hi chuan Vairengte striker hian hrem vanga vawi khat a inlan lo tih lohah chuan match zawng zawngah a khel vek.

An hre ta

Hero Super Cup, Calcutta Premier Division leh Durand Cup te khelh zui a ni a, David-a'n goal a khung zel avangin Kolkata football ngainatute chuan David-a an hre vek tawh a, Mohammedan fan-te âtchilh rawn a ni mek.

Super Cup-ah match thum aṭanga goal khat khungin, assist vawi khat a nei a, Durand Cup-ah goal ruk leh assist vawi khat neiin, West Bengal top flight league-ah match 10 khel tawha goal 13 khungin, assist vawi khat a nei a, top scorer a ni mek - amah hnaih bertu Mohun Bagan striker Suhail Bhat chuan goal riat a khung tawh.

CPA-ah hian team 26 awmin, group hnihah club 13 ve ve awmin ṭhen an ni a, group pahniha a sang pathum ve ve chu Super Six round-ah lutin, Super six-a lut team-te hi inkhel kualin point hmu sang ber an champion ang - Mohammedan hian group A-ah match khat chiah hmabak tawhin, hma an hruai mek a, Super Six an lut chiang.

Beiseina neitu

Vairengte tlangval David-a chuan, "Chance ka neih theihna tur club a nih beiseiin Mohammedan hi ka zawm a, keimahah pawh tumruhna ka nei nasa lehzual. Theihtawp ka chhuah reng a, ka inthlahdah lo," tiin Vanglaini a hrilh.

David chuan hmasawn tuma theihtawp a chhuah reng thu sawiin, "Tun ang taka season hman hi chu ka inbeisei phak bik lo. Hei aia sang zawk thlen hi ka duh a, tun season a ṭha thei ang bera khelh a, league sang zawk khelh zel ka duh a ni," a ti.

Kum 21 mi striker chuan, "Ka kum a la naupang a, India tana age level-a inlan phak pawh a châkawm khawp mai," a ti a, zawi zawia hmasawn zel a tum thu Vanglaini a hrilh - duhsakna kan hlan e.