Samuel-a'n Mohammedan a zawm

Mizo midfielder hriat hlawh Samuel Lalmuanpuia chuan Mohammedan Sporting Club a zawm a, Zemabawk North tlangval hian season khat chhung atan Kolkata club-ah hian contract a ziak.

Shillong Lajong captain hlui Samuel-a hian season hmasa kha Roundglass Punjab tan a khel a, I League nomawi a chawipui hnuah Kolkata club a pan leh ta.

ISL club Kerala Blasters, Mohun Bagan leh Odisha tan pawha lo khel tawh Samuel-a chuan, "Match khelh tam ka duh a, Kolkata football tem leh hi ka châk bawk. Club hlun an nihna pawh hian min hip hle," tiin Vanglaini a hrilh a, club hrang hrang nen indawr nual mah se Mohammedan a thlan chhan a sawi.

I League 2017-18 season-a Best Emerging Player-a thlan Samuel-a hian Minerva Punjab leh Aizawl FC tan pawh a lo khel tawh a, a ball thiamna, chet ranna leh set piece pet thiamna chu a larpui a ni.

Mohammedan hian Mizo player an kawl nual. Samuel-a bakah hian striker David Lalhlansanga, Lengpui forward Lalremsanga Fanai, Hyderabad aṭanga loan-a an hawh keeper Lalbiakhlua Jongte, Chhinga Veng defender hlui Vanlalzuidika Chhakchhuak leh Zodingliana Tochhawng te an kawl.

NorthEast United, Delhi Dynamos leh Pune City fullback hlui Adinga hi Mohammedan-ah hian captain a ni mek a, Mizo player-ten Kolkata club-ah hmun pawimawh an chang hlawm.

Kolkata club hlun Mohammedan hian coach Mehrajuddin Wadoo an ban hnuah coach turin Andrey Chernyshov an la lut a, Spartak Moscow boss hlui hian 2021-22 season khan Mohammedan hi a lo enkawl tawh.