CAS-in Man City chungchang ngaihtuah dawn

Europe-a football thuneitu sang ber UEFA chuan Manchester City chu 'club licensing and financial fair play' dan an zawm loh avangin khan season hnih chhung an hnuaia inelna hmachhawn thei lo turin kumin February thla an hrem thu an ti chhuak a. Premier League champion lai hi euro maktaduai 30 (£25m) chawi tura tih an ni bawk. English club chuan Court of Arbitration for Sport (CAS) hnenah an zualko a, infiamna lama thuneitu sang CAS chuan Man City chungchang hi June 8 aṭangin a ngaihtuah ṭan dawn.

Man City chungchang hi ni thum chhung ngaihtuah a ni dawn a, mipui tan tel theih a ni dawn lo. CAS chuan, "Covid-19 vanga zin rem lote a awm avangin an chungchang ṭhenkhat hi chu video conference hmanga ngaihtuah a ni ang," tiin English club chungchang an rel dan tur an sawi.

Club Financial Control Body (CFCB) hnuaia ding Adjudicatory Chamber chuan, "Kum 2012-2016 chhunga  sponsorship aṭanga an sum hmuh an account inziah dan leh UEFA hnenah an sum chetvel dan a dik loin an thehlut," tiin Man City dan bawhchhiat dan hi an tarlang tawh a, English club-in an chhui zuinaah an thlawp ṭha lo tih an sawi bawk.

Man City erawhin UEFA chu tum nei saa an chungchang chhui zuiah an puh a, an thutlukna siam danah an lungawi lo. English club chuan, "December 2018 khan UEFA chief investigator chuan an chhui hauh hmain Manchester City hrem theih dan a thlir lawk tawh a, an chhui na put ru a awm chhoh reng danah an hremna lek kawh dan hi mak kan ti lo. 

"He buaina hi UEFA bul á¹­an, UEFA chhui zui leh UEFA thutlukna siam a ni a, he thutlukna dik lo tak hi a rang thei ang berin CAS-ah kan zualko pui ang," tiin thuchhuah an siam a, an sawi angin an zualko.

CAS thutlukna hian Premier League thui tak a nghawng dawn a, UEFA hremna hi a kaltlang a nih chuan league-a pangana tan pawh Champions League khelh a beisei theih ang.