Besiktas-ah Eric Bailly a kal

Manchester United defender Eric Bailly chuan Turkish club Besiktas a zawm a, Bailly contract rei zawng hi tarlan ni lo mah se kum khat chhung atan niin khawthlang media-te chuan an tarlang.

Bailly hian June 2016 khan Villarreal aṭangin United hi a zawm a, pound maktaduai 30 man niin, Jose Mourinho-a'n Red Devils a enkawl tirha player a lakluh hmasak ber a ni.

Ivory Coast international hi Red Devils tan match 113 a inlan zui a, goal khat a khung. Mahse, hliamin a tlak buak reng avangin a hunlaia a thawm nat ngaihtuahin beisei a phak lo. League Cup, FA Community Shield leh Europa League nomawite Red Devils-ah hian a chawi.

December 2021-a United-in 3-1 a Burnley an hneh hnuah khan Bailly hi competitive match-ah chuan Reds tan a inlan leh tawh lo a, Erik ten Hag ruahmannaah a tel loh avangin season hmasa pawh kha Marseille-ah loan-in a lo khel tawh.

Besiktas chuan thuchhuah siamin, "Kan jersey ropui tak nen Eric Bailly hian hlawhtlinna duhawm tak changin, club tan hlawk taka tha a thawh kan beisei a, mipui hmaah zah tak chungin kan pho chhuak a ni," an ti.

Tun nipui transfer-ah United player pahnihin Turkey an pan a, Bailly hma hian Fenerbahce chuan Fred chu August thla khan an lo la lut tawh bawk - Turkey hian September 15 thleng transfer hun an hawng a ni.