US OPEN : Alcaraz hmachhawn tur Zverev

US Open 2023 quarter-final a hmuhnawm dawn - world number 1 Carlos Alcaraz leh Alexander Zverev ten semifinal luh an inchuh dawn, player pahnih hi tournament kal laia khel ṭha an nih avangin an inkhel tur hi a hmuhnawm ang.

Nimin zing last 16 inkhelah Zverev hian Jannik Sinner nen set nga an khelh hnuah hnehna a chang hram. Thawhṭanni zan khan seeded pakhatna Alcaraz chuan harsa vak loin quarterfinal a lo invawkai tawh thung a ni.

Nizan khan Novak Djokovic chuan quarterfinal a khel tawh, tualchhung tlangval Taylor Fritz nen an inkhel a, result erawh kan hre hman lo. Zaninah quarterfinal match dang pathum khelh a ni ang.

Hna awlsam

Champion lai Alcaraz chuan Arthur Ashe Stadium-ah amah ṭantute lawmna tur a siamsak, darkar khat leh minute 57 chhung lekin Matteo Arnaldi chu 6-3, 6-3, 6-4 in a hneh a, season thum chhung a zawnin quarterfinal a lut ta.

US Open 2023 khelh hmain Arnaldi hian Grand Slam bikah match khat bak chak ni hmel a la hmu ngai lo, kuminah erawh last 16 hial a thleng. Mahse, seeded pakhatna Alcaraz laka set la tur chuan a la hriam tawk lo a ni.

Spanish tlangval Alcaraz chuan, "Ball hmasa ber aṭanga a tawp thleng khan ka khel ṭha ka inti ve hle a, a pawimawh lai chu tihsual ka nei tlem leh a hun pawimawh lai taka ka che fuh ṭhin kha a ni, sawisel tur ka nei hran lo," tiin a khelh danah a lungawi hle.

Wimbledon champion Alcaraz hian a tan hard court, grass court leh clay court te chu inkhelhna hmun ṭha a ni vek tih a sawi a, tun dinhmunah chuan hard court chu a nuam tih berna hmun a nih thu a sawi bawk.

Hna hautak

Alcaraz a chak awlsam viau laiin Alexander Zverev tan erawh hna a hautak hle thung. German tlangval hian darkar li leh minute 41 chhungin Sinner chu 6-4, 3-6, 6-2, 4-6, 6-4 in a hneh a, fiahna hautak a paltlang a ni.

Zverev hian season hmasa khan hliam vangin US Open hi a khel thei lo, kum 2020 erawh kha chuan final hial a lo lut tawh. A hliam dam hnuah ṭha tak taka khelh nei leh tawh mah se, inelna lianah bik chuan a khelh ṭhat ber ṭum a nih a rinawm.

Kum 26 mi Zverev chuan, "Ka kerek hliam dam hnua ka khelh ṭhat ber ṭumah ka ngai, tunah chuan huaisen takin ka lo kir leh thu hi ka sawi thei tawh ang, hetiang hun thleng tur hian ka nghak rei hle a ni," a ti.

Quarterfinal-a a khingpui tur Alcaraz nen hian tun hmain vawi nga an inhmachhawn tawh a, ṭum thum hnehna changin record a nei ṭha zawk. Seeded 12-na Zverev tan beiseina sang tak a awm thei ang, paltlang tur erawh a hautak dawn.

Inkhel dang

Last 16 inkhel dangah Daniil Medvedev chuan Alex de Minaur chu 2-6, 6-4, 6-1, 6-2 in a hneh a, tun hnai kum nga chhunga a vawi li nan US Open quarterfinal a lut, a tan chuan New York khawpui hi inkhelh nawmna hmun tiin a sawi theih.

Mahse, hnehna a chan hnuah Medvedev hian inkhelh harsa a tih thu a sawi. Medvedev hi Russian mi a ni a, an ram a vawt hle - tunlai United States boruak lum lai a ni a, a tan khawlum hnuaia inkhelh a harsat thu a sawi a ni.

Seeded pathumna Medvedev hian quarterfinal-ah Andrey Rublev a tum leh dawn. Rublev hian Jack Draper chu 6-3, 3-6, 6-3, 6-4 in a lo hneh ve thung. Draper a tlak takah chuan British player an tla kim ta chiah.

Rublev chuan, "US Open quarterfinal ka khelh hnuhnung pathumah a vanduai zawk ka ni a, tun ṭumah chuan hnehna changtu ka nih theih ngei ka beisei," a ti. Rafael Nadal, Medvedev leh Frances Tiafoe te a ngam lo tawh a, tunah chuan result ṭha a beisei.