Liverpool-in min mamawh lo - Hendo

Al Ettifaq midfielder Jordan Henderson chuan Saudi Pro League club a zawm chhan chu sum vang a nih loh thu a sawi a, Liverpool-ah chuan mamawh ni tawh loa a inhriat thu a sawi bawk.

Liverpool captain hlui chuan, "Liverpool ami tu emaw ber khan, 'Heta cham zel tur hian kan duh che a ni,' min ti ngat se chuan, thawnthu hi a danglam ngei ang. He thu ka sawi avang hian chhuak turin min nawr ka tihna a ni lo a, tuman chhuak tura min duh thu pawh an sawi chuang lo.

"Mahse, a nihna takah chuan club-ah khan min mamawh tawh loa hriatna kha a lian êm êm mai a ni," a ti a, Anfield a chhuahsan chhan a sawi - Hendo hian 2022-23 season-ah khan regular takin Liverpool-ah hmun a chang phak meuh tawh lo a, nipui transfer-ah Dominik Szoboszlai leh Alexis Mac Allister ten Liverpool an zawm bawk avangin a khel tlem lehzual dawn tih kha a chiang.

Steven Gerrard enkawl Ettifaq an lo lang a, English midfielder hian Liverpool-a bench luahlum ai chuan Saudi club-a sum hlawh ṭeuh a, inkhelh tam a duh - Hendo hian hlawh tam viau mah se pawisa vanga chhuak erawh a nih loh thu a sawi!

Hendo chuan, "Ka thusawi hi mipuiin an duh chuan an awihin an awih lo thei. Mahse, ka career-ah hian engtiklai mahin pawisa hi a pawimawh ber a ni ngai lo," a ti - a sawi angin awih harsat erawh an tam zawk mai thei.

Kum 33 mi midfielder hian Ettifaq-ah hian kar khatah £700,000 a hlawh a, Liverpool-a a hlawh aiin a let li velin a tam zawk! Hendo chuan, "Jurgen Klopp nen kan inkar boruak a ṭha reng a, mahse, kan titi dun khan hmun ka chang tam tawh dawn lo tih ka hre thei a ni," tiin a sawi bawk.