Jabeur leh Pegula an tla

US Open seeded pathumna Jessica Pegula leh Wimbledon finalist Ons Jabeur chu quarterfinal lut phak loin an tla - world number 1 thar tur Aryna Sabalenka erawhin harsatna lian tham tawk loin quarterfinal a lut thung.

American nula Pegula hi champion tura rinkai zinga mi a ni, mahse amah ang bawka tualchhung nula Madison Keys lakah a khel chhe hle a, set pawh la loin 6-1, 6-3 in a chak lo zawkah a ṭang a ni.

WTA Tour dangah hlawhtling fo tawh mah se Pegula hian Grand Slam bikah quarterfinal a la pel ngai lo, player ṭha leh ropui dangte huanga zuang lut ve tur chuan inelna lianah sulhnu ṭha a neih ve a pawimawh.

Season hmasa US Open finalist Jabeur pawh Chinese nula Zheng Qinwen lakah 6-2, 6-4 in a chak lo. Kum 20 mi Qinwen hian a vawi khat nan Grand Slam quarterfinal a lut a, a hmabak chu Aryna Sabalenka a ni dawn.

Jabeur hi player ṭha leh theihna nei sang a ni - major tournament an khelh hnuhnung zawk Wimbledon-ah pawh khan final a lut. Mahse, grass court inelna lian a hmachhawn zawh hnuah a damlo a, inelna hmachhawn tho mah se ngai a la awh chiah lo.

Inkhel dangah chak tura rinkai Sabalenka tan harsatna a awm lo. Sabalenka hian New York khawpuia inelna neihah hian kum 2021 leh 2022 te khan semifinal a lo lut tawh, tun ṭuma a khingpui Daria Kasatkina pawh 6-1, 6-3 in a hneh.

Australian Open champion Sabalenka chuan, "Season bul kan ṭan dawn khan sang tak thleng turin beiseina ka nei a, chumi tur chuan ruahmanna hrang hrang pawh ka siam, zawimuanga ka tihlawtling ve thei zel hi ka lawm hle," a ti.

US Open khelh laiah world number 1 Iga Swiatek chu last 16 paltlang zo loin a tla a, champion laiin a ranking point a hum theih dawn loh avangin a dinhmun pawh a hloh dawn. World ranking chhuak tharah chuan Sabalenka hi number 1 a ni ang.