US OPEN : Fritz hnehin Djokovic a tlang
Novak Djokovic hi chu a danglam ṭhin, tennis a khelh piah lamah inkhel entute tihphur a thiam tel tlat zel - tun hma lama maksak taka a lo chet tawhna US Open semifinal a invaw kai leh ta.
Quarterfinal inkhel dangah Ben Shelton a chak bawk. Vawi thum champion tawh Djokovic leh Shelton te hian final luh an inchuh zui leh ang, nizan khan quarterfinal match dang pahnih khelh niin result kan hre hman lo.
Vawi 47-na
Novak Djokovic chuan a vawi 47 nan Grand Slam semifinal a lut, a thiam pali zinga inhlangkai tur hian September 5, Thawhlehni zan khan Taylor Fritz chu 6-1, 6-4, 6-4 in a hneh, chak tur hian darkar hnih leh minute 35 bak hun a mamawh lo hial a ni.
US Open nomawi a chawi leh a nih chuan major title 24 a la tling dawn, champion hnem ber Margaret Court-i record a nihrual nghal dawn a ni, sulhnu ropui bik nihrual tur hian vawi hnih chak a la hmabak.
World number 1 ni leh mai tur Djokovic chuan, "Infiamna hian num hlimawm leh lawmna tam tak min pe. Serbia rama piang leh seilian ka ni a, indona leh tualchhung buaina hrang hrang karah kan ṭhang lian.
"Chutiang harsatna hrang hrang karah chuan ka tum ram thleng tura min thlawp tlattu an awm a, anni hian tun dinhmun min hruai thleng," a ti a, a naupan laia an beisei ngam loh thil a tawn tawh thu a sawi tel bawk.
Mipui an hlim
New York khawpuia tennis stadium hmingthang ber Arthur Ashe Stadium-ah an inkhel a ni a, khaw lum zawng chu 30C niin a bik takin European player-te tan chuan khaw lum ringawt pawh buaipui tham a ni.
Djokovic-a khingpui hi American tlangval a ni a, a hmuna entu tam zawkin Fritz an ṭan hle. Mahse, a tawpah erawh hnehna changtu zawk Novak lawmpuiin mipui lamin kut an beng, a chak zawk an lawmpui takzet.
Kum 2007 daih tawh kha a ni a, Arthur Ashe Stadium-ah hian Djokovic chuan thil dangdai tak a lo ti tawh. A vawi khat nan US Open quarterfinal a paltlang a, interview tituin a ngen angin Maria Sharapova-i service leh chet dan a zirsak.
He thil thleng hi mipuiin an lawm hle a, kum 16 a liam hnuah pawh thil thleng hi an la theihnghilh lo - Carlos Moya a hneh ṭuma inkhel entute thawm ang tho khan tun ṭumah pawh hian thawm a ṭha leh hle a ni.
Hmabak Shelton
Nimin zing quarterfinal inkhel dangah Shelton chuan, amah ang bawka American tlangval Frances Tiafoe chu darkar thum leh minute sarih chhungin 6-2, 3-6, 7-6 (9-7), 6-2 a hnehin semifinal a invaw kai ve bawk.
Shelton hi kum 20 mi chauh a la ni a, tualchhung mipa player zingah tun hnai season 31 chhunga US Open semifinal lut thei naupang ber a ni hial. A hmabak erawh Djokovic a nih dawn avangin a hautak dawn hle, beisei bo erawh a ni bik lo.
6ft 4in zeta sang, world number 47 ni lai Shelton chuan, "A chang chuan engmah hlauh nei loa chet a ngaih chang a awm, chutiang hunah chuan huaisen taka kan beih chuan thil mak a lo thleng thei," a ti a, a thlen chin chu a tan thil mak a ni tih a sawi.
US Open-ah hian kum 2003 khan Andy Roddick a champion, a hnu lamah tualchhung tlangval an la champion leh ngai lo. American mipuiten an mi leh sa champion hmuh an châk, kum 20 chhung an nghah chu Shelton hian tihlawhtling turin remchang a nei mek.