England player ṭha ber Saka

Bukayo Saka chu a zawna a vawi hnih nan England Player of the Year atan thlan a ni. Arsenal player zingah hetiang chawimawina dawng thei awmchhun a ni a award hi kum 19 kalta aṭanga sem ṭan kha a ni.

Gunners forward hian Thawhlehni khan kum 22 a tling fel ve chiah a, hmanni lawk khan PFA Young Player of the Year atan thlan a lo ni tawh bawk, tun hnaiah chawimawina a dawng ta malh malh.

Saka hnungah hian Real Madrid midfielder Jude Bellingham a awm, an ram captain leh goal khung hnem ber ni bawk Harry Kane chu pathumnaah a awm thung - an pathum hian Euro 2024 qualifier lamah pawh enzui an hlawh ang.

Season hmasa chhung khan Saka hian England tan match 10 khelin goal sarih a khung. Qatar World Cup-ah khan goal thum a khung - Iran leh Senegal an hneh ṭumin goal a khung a ni.

England manager Gareth Southgate kaihhruaina hnuaiah hmun pawimawh a chang. Three Lions tan hian inelna hrang hrangah match 28 khelin goal 11 a khung a, a ṭhiante khung tur vawi sarih a siamsak bawk.

Ram tana a chet ṭhat ang bawkin Arsenal tan pawh rinrawl a ni. Season hmasa Premier League bikah phei chuan a khel kim vek - North London club tan hian inelna hrang hrangah goal 40 khungin assist vawi 42 a nei tawh, kum 22 tling hlim sulhnu atan chuan a ṭha hle.