Inkhel tawk tur Electric Veng Vs Project Veng

Zote Toyota MPL10 round 4 chu vawiin aṭangin 1st Bn MAP Ground-ah khelh ṭan a ni dawn a, ni khatnaah hian point khat chauh la hmu pali an inlan dawn a, an intluktawk dawn tih a chiang. Chawhma dar 11:00 hian Electric Veng leh Project Veng an inkhel dawn a, an player neih dan pawh a inang tawk avangin inkhel nung ṭha tak a beisei theih ang.

Electric Vengin Chawnpui laka point khat an hlawhchhuah theih nan captain C. Lalhriatpuia a ṭangkai a, Hriata hi striker ni mah se kil tinah a awm tih theih turin tlarhnung lam pawh set piece-ah a pui ṭha hle. Project Veng an hmachhawn hunah pawh hian en bik tur a ni thei ang.

Project Veng pawhin Police lakah point hlu tak an hlawh chhuak a, inkhelh hmain result chauh hre lawk se an lawm ang. Amaherawhchu penalty ṭum hnih ngawt an chawi avangin Kolasib club hi point khatah an lawm ta lo. Police laka point khata an lawm loh chuan Electric Veng lakah chuan chak an inbeisei ang.

MPL kai thar hi round hmasa pahnihah kha chuan inkhelh zawhah an khaw lam an pan lehnghal a, tun ṭumah erawh round pahnih a inzawn deuh avangin Aizawlah an cham thung. Round pahnih inkara hahdamna hun ṭha an neih theih avangin Electric Veng lakah pawh an khel a nung sawt turah a ngaih theih.

Project Veng hian Chanmari leh Police an hmachhawn ṭumin goal venhim hna an thawk a, tlarhnung an rem phui ṭha. Electric Veng lakah hian coach R. Lalrammawia (Patea) hian attacking game nge defensive game a khelhtir dawn tih hi hriat châkawm lai chu a ni.