MPL10 boruak ti 'hot'tu 1st Bn MAP Ground

Zote Toyota MPL10 chu round thum khelh zawh tawh a ni a, round hmasa pahnih RG Stadium-a khelh a nih hnuah round 3 chu 1st Bn MAP Ground, Armed Vengah khelh a ni. RG Stadium aiin 1st Bn MAP Ground hi a te zawk a, inkhel result-ah pawh nghawng lian tak a awm niin a lang.

Chanmari FC-in Chhinga Veng FC 2-1 in an hneh a, K. Malsawmkima hote hi an squad a chhah ṭhat bakah Chhingcows hi player 10-a an khelh bawk avangin result mak a ni lo. Chanmarians hi vannei phei se chuan goal tam zawkin an chak ngei ang.

Electric Veng FC leh Chawnpui FC inkhelah MPL champion lai Chawnpui hi rinkai zawk ni mah se 1-1 in inkhel a tawp. Electric Veng hian chance an ngah zawk a, Chawnpui hi an vannei zawk. Round 3 inkhel pathuma chance tamna ber a ni hial ang, team pahnihin vawi nga aia tam chance ṭha an nei ve ve.

I League club Aizawl FC pawhin Venghnuai an hneh thei bik lo a, 1-1 in inkhel a tawp. Field a tet avangin AFC-in game an sawi thei lo a, Venghnuaiin MPL9 semifinal-a an hneh I League club lakah point hlu tak an hlawh chhuak.

1st Bn MAP Ground hi Mizoram Police training-na hmun a ni a, amaherawhchu Police hian kai thar Project Veng FC lakah point khat an hlawh chhuak hram. Kolasib club-in tlarhnung an rem phui ṭha a, field dung a tawi avangin Police winger tlan chak Lalbiakhlua (Biaktea) te an ṭangkai nep.

Police meuh pawhin 'home advantage' an nei bik lo a, an khelmual tetna hi an hmang ṭangkai thei lo. Round 3-ah champion tura rinkai ni pha Aizawl FC, Police leh Chawnpui ten point khat ṭheuh bak an hmu thei lo.

1st Bn MAP Ground-ah hian vawiin aṭanga khelh ṭan tur round 4 bakah round 5 leh round 7 te khelh a la ni dawn. Round 3 aṭangin chak chiang a awm lo tih a lang tawh a, round thum khelh leh turah a ngaihnawm ang.