Chhinga Veng an tho chhuak dawn em?

I Day Football 2023 champion Chhinga Vengin Zote Toyota MPL10-ah chak an la nei lo. Coach langsar Lalsangzuala Hmar enkawl Chhingcows hian match thumah point khat lek an la hmu a, vawiin chawhnu dar 2:00 hian FC Venghnuai an hmachhawn dawn.

Chhinga Veng hi a nihna takah chuan I Day Football aiin MPL10-ah hian an ṭha tawh zawk a; Vanlalbiaa Chhangte, Zonunmawia, Ephraim Lalremtluanga, Lalsawmzela leh Vanlalawmtluanga te an neih belh. Mahse, Chhingcows hi I Day Football semifinal-a an hneh Chanmari lakah 2-1 in an tlawm a, captain MS Dawngliana hnawhchhuah a nih avangin FC Venghnuai lakah hian an chhawr thei dawn lo.

Chhingcows tana chanchin lawmawm erawh MPL-ah rawlthar duhawm Suanngaihmuana a rintlak a, winger an neih ṭhat bawk avangin Venghnuai tlarhnung an fimkhur a ṭul dawn. Chanmari laka an tlawm ṭum hian Mabiaa, Sawmzela leh I Day Football best player Lalnunzira te bench-ah an dah thei a, captain Dawngtea aia no. 10 hna chelh turah pawh an buai kher lo ang.

Chhinga Veng khingpui tur Venghnuai hian Aizawl FC an chelh theih avangin inrintawkna nasa tak an nei dawn. Armed Veng South tlangval C. Ramdinmawia'n a hna a hre chiang a, a ṭhiante a fuih ṭhat bawk avangin tlarhnung a phui phah. Chutihrualin tun ṭuma Venghnuai hmachhawn tur chu Aizawl FC aia che rang Chhinga Veng an nih dawn avangin coach K. Lalthlamuana pawhin ngaihtuahna a sen leh hret a ṭul dawn a ni.