King's Cup: India hmaah Iraq; Lianzuala a damlo!

Football Association of Thailand buatsaiha neih King's Cup 2023 chu vawiinah khelh ṭan a ni dawn a, match hmasa berah India chuan Asian football powerhouse zinga mi Iraq an hmachhawn dawn - a awlsam lo ang.

Vawiin tlai dar 4:00-a team pahnih inhmachhawn tur hi Eurosport-ah en theiha pekchhuah a ni dawn a, online-a en duh tan FIFA Plus TV lamah a en theih bawk ang.

Blue Tigers squad-ah hian Mizo pahnih awmin, Mumbai City forward Lallianzuala Chhangte leh East Bengal defender Lalchungnunga te an ni a, Lianzuala hi damlohna avangin a inlan thei dawn lo.

A pawi

India hian Thawhṭanni zan khan King's Cup khelhna tur hmun Chiang Mai, Thailand an thleng a, mahse, India forward pawimawh Lianzuala chuan khawsik vangin team training a zawm ve thei lo - Lunglei tlangval hi vawiinah pawh a inlan lo ang.

Lianzuala chuan, "Thawhṭanni aṭang khan ka nuam lo ṭan a, vawiin chu ka zia deuh tawh e. Chutihrual chuan training pawh ka la zawm hleithei lo a, inṭawngṭainaa min lo hre reng turin ka ngen che u a ni," tiin Vanglaini a hrilh a, AIFF footballer of the year-in ṭawngṭaipuina a ngen e.

India chhuanvawr Lianzuala chuan sawi zawmin, "Kan match hnihna tal chu khel thei tura in 'fit' hman ka tum ang," a ti a, inkhel loa Thailand hawsan a tum lo.

A kalphung

King's Cup-ah hian Thailand football thuneitute chuan ram pathum an sawm a, India leh Thailand bakah hian Lebanon leh Iraq chu he inelnaa inlan turte an ni.

India leh Iraq ten match hmasa ber khelin, zanin dar 7:00-ah Thailand leh Lebanon te an inhmachhawn ve leh ang. Inkhel pahniha chak zawk ve ve ten final lutin champion an inchuh ang a, a chak lo pahnihin pathumna hmun ruak an inchuh dawn thung.

Blue Tigers hian Thailand-ah match hnih chu an khel chiang dawn tihnna a ni. Match khatah Lianzuala a inlan lo dawn phawt a, captain Sunil Chhetri chu a nupuiin nau a neih avangin a zin ve lo bawk.

Iraq chu le

Spain assistant coach hlui Jesús Casas chuan Iraq hi enkawlin, FIFA ranking-ah 70-na an ni mek - an squad-ah European football khel an awm nual a, Blue Tigers tan hna a awlsam dawn lo.

Tlarhmaah Aymen Hussein hi Morocco club lar leh ṭha Raja CA tana khel a ni a, kum 21 mi Ali Al-Hamadi pawh hi League Two club AFC Wimbledon tan a khel mek. Kum 26 mi lek ni chungin defensive midfielder Amjad Attwan hi ram tan match 72 a khel tawh a, tawnhriat a nei ṭha hle.

Qatar SC attacking midfielder Bashar Resan hi India tlarhnung tan buaipuitham tling tura ngaih a ni a, kum 20 mi Zidane Iqbal hi Manchester United academy chhuak niin, Eredivisie club Utrecht tan a khel mek.

India an ṭha

Igor Stimac-a kaihhruaina hnuaiah India an 'form' viau a, kuminah match 11 khel tawhin tlawm an la nei miah lo - vawi hnih draw neiin, vawi kua an chak a, an chak zinga match hnih hi hun pangngaia inhnehtawk hnua penalty hmanga an chak a ni thung.

Hriat tel tur chu Blue Tigers hian team nem ringawt an hmachhawn bik lo a, Lebanon leh Kuwait te pawh an hneh zingah an tel - hei hian Indian football-in hma a sawn tih a pholang a, India hi zuam chi an ni lo.

Chutihrual chuan Lianzuala leh Chhetri an awm loh chuan tlarhma an bil sawt dawn tih a chiang a, Mahesh Singh, Manvir Singh leh Ashique Kuruniyan ten mawhphurhna an lak thiam a ṭul ang.

Player dang?

Blue Tigers tan Gurpreet Singh Sandhu chu si ban nghaktu a ni leh ngeiin a rinawm a, tlarhnung laia khel tura Anwar Ali leh Sandesh Jhingan an awm avangin Lalchungnunga tan hmun chan nghal a la harsa mai thei a, fullback Akash Mishra a inhliam thung.

Hriat tel atana ṭha chu India hian Thailand-ah ni hnih chiah training an nei hman a, Stimac-a'n a player hman thiam dan saa team rem a thlang mai thei - midfield-a khel turin Anirudh Thapa, Sahal Abdul Samad leh Suresh Singh te ho an awm.

Blue Tigers hian kumin an match-ah tlawm an la neih loh vek rualin, India-ah vek an la inkhel - vawiin inkhel tur hi kumina ram pawna an khelh hmasak ber tur a ni a, India tan fiahna tiin a sawi theih ang.

===================

''Training-na hun kan nei tam lo a, kan hun neih chhun erawh kan chhawr ṭangkaiin, team boruak pawh a ṭha hle. India tana ka fehchhuah hmasak ber a nih avangin a phurawm ka ti a, chutihrual chuan Iraq hi a hautak dawn - tun hnai an result pawh a chhe lo a, Europe team thlenga friendly match khelhpui an ni a, team ṭha tak an ni. Mahse, football a ni miau a, thleng thei lo a awm lo. Theihtawp kan chhuah phawt ang a, kan result chu kan la en leh ang chu.''
- Lalchungnunga, India defender