US beiseina siamtu Gauff

Coco Gauff chuan Jelena Ostapenko hnehin US Open semifinal a lut - American tleirawl hian an rama tennis inelna lianah hian quarterfinal a paltlang vawi khatna a ni a, a tan chanchin lawmawm leh chhinchhiah tlak a ni.

Seeded parukna Gauff hian darkar khat leh minute sarih chhung lekin Ostapenko hi 6-0, 6-2 in a hneh. Latvian nula Ostapenko pawh chak lo zawk ni mah se US Open bikah chuan a thlen san ber ṭum a tawng.

Kum 16 mi Gauff hian final lut tur chuan French Open pahnihna Karolina Muchova a hneh leh a ngai dawn. American mipuite ṭan rawn a ni bawk a, boruak nuam tak a tawng chhunzawm theiin a rinawm.

Gauff chuan, "Grand Slam ka khelh tawh hoah kha chuan boruak ka zo lo ṭhin, khatiang hun kha ka paltlang ta niin ka hria. Taksa leh rilru a damin inkhelh nuam ka ti hle a, tawnhriat ka nei ṭha ve zel bawk," tiin a sawi.

Arthur Ashe Stadium-a inkhelah hian Gauff-i'n a khingpui service hi vawi ruk ngawt a chhuhsak a, a service vawi khat hloh ve mah se buaina lian tham a tawk lo. A service ṭha tak hi semifinal-ah pawh hman ṭangkai leh a tum ang.

Quarterfinal inkhel dangah seeded 10-na Muchova chuan Romanian nula Sorana Cirstea chu 6-0, 6-3 in a hneh a, tennis inelna lian berah hian semifinal a luh vawi khatna a ni, a tan dai ngai loh ram zel a ni ta.

Muchova chuan, "A hmasa berah chuan ka hnehna chan leh semifinal ka luh hi lawm phawt ka duh, chumi hnuah Coco nen kan inkhelh tur chu ka ngaihtuah chauh ang," tiin a sawi.