Argentina coach a fimkhur

World champion Argentina chuan World Cup 2026 atan qualifier an khel ṭan dawn a, an nomawi humhim tura rahbi hmasa an rap dawn tihna a ni - Zirtawpni zing dar 5:30-ah Ecuador an mikhual ang.

Argentina coach Lionel Scaloni-a'n player 32 ngawt a ko, captain Lionel Messi bakah tawnhriat nei ṭha winger Angel Di Maria leh defender Nicolas Otamendi te an tel a ni.

Scaloni chuan, "A tir hi a harsa lai chu a ni ṭhin, tun ṭuma qualifier kan khelh turah pawh hian match hmasa lam hi chu a awlsam dawn lo. Chutihrualin, ka naute hi tun hma aṭanga khel ho hnem tawh an nih avangin kan buai loh chu ka beisei bawk.

"Coaching staff lam chuan ngaihtuahna kan hmang nasa a, a ṭha ber tur nia kan ngaih pawh kan hre tawh. Fans lam pawh an phur takzet a, player pawimawh kan duh ang min tih hlawhtlinsak leh a rinawm," tiin a sawi.

Messi-a'n Major League Soccer (MLS) a pan hnuah ram tana a inlanna hmasa ber a ni dawn - Inter Miami forward hian Copa America 2024 khelh a la tum; World Cup 2026 erawh a khel ngei dawm em, tih a la sawi theih loh thung.