Club World Cup draw neih a ni

Football khawvela khawmualpui champion-te inhmachhawnna ṭhin FIFA Club World Cup draw neih a ni leh ta a, champion lai Manchester City chuan Club Leon leh Urawa Reds inkhela chak zawk an hmachhawn ang.

December 12-22 inkarah inelna hi neih tura ruahmanna siam a ni a, tun hnaia sum hmanga infiamna khawvel run mektu Saudi Arabia chuan kumin World Cup hi Jeddah khawpuiah a thleng dawn - khawvelin Saudi sum mawm a hawisan tak tak thei lo!

FIFA Club World Cup hi nakkumah chuan team 32 inelna tura ruahmanna siam a ni tawh. FIFA chuan inelna hi hlut zawk a nih theih nan kum li dana khelh ṭhin turin an ti bawk a, World Cup hma kumah khelh ṭhin a ni ang.

Tute nge?

Club World Cup-ah hian team paruk an inel dawn a, khawmualpui champion club parukte an inlan dawn bakah inelna thlengtu Saudi Pro League champion Al Ittihad an inlan ve dawn bawk - Ittihad hi Karim Benzema, N'Golo Kante leh Fabinho te ho khelhna an ni a, beisei an nei sang ang.

Saudi champion Al Ittihad hian first round aṭanga inelna hmachhawnin, OFC Champions League champion lai Auckland City nen first round-ah an intawng ang a, he inkhela chak zawk hian second round-ah Africa champion Al Ahly an hmachhawn leh ang.

Second round lehlamah CONCACAF Champions League nomawi chawitu Club Leon leh Asian champion Urawa Red Diamonds an inhmachhawn dawn thung - Urawa Red hi Japanese club an ni a, Leon hi Mexican club an ni thung.

Hei le City

European champion Manchester City chuan inelna hi semifinal aṭangin an hmachhawn dawn a, Pep Guardiola naute hian Urawa Red leh Club Leon inkhela chak zawk an lo hmachhawn ve leh dawn a ni.

City bakah South American champion team chu semifinal khel tura tling chiangsa an ni a, mahse, Copa Libertadores-ah hian champion an la awm rih loh avangin eng club ber nge South America aiawhin inlan dawn a la hriat theih loh.

Copa Libertadores hi semifinal khelh la hmabak niin, Boca Juniors vs Palmeiras leh Fluminense vs Internacional ten final luh tumin tun thla tawpah semifinal an la khel dawn chauh - final hi November 4-ah an khel dawn a ni.

CWC & Europe

Club World Cup hi an vawi 20 khelhna tur niin, inelna hnuhnung vawi 10-ah European club vek an champion - Real Madrid chu champion ngun ber niin vawi nga an champion tawh a, season hmasa pawh khan 5-3 a Al Hilal hnehin champion nomawi an chawi.

European club an champion loh ṭumah hi chuan South American team vek an champion a, mahse, South American team an champion hnuhnung ber hi 2012 kha ni tawhin, Corinthians an champion - anni hian final-ah Chelsea chu 1-0 in an hneh.

Premier League club zingah CWC nomawi chawi tawh team pathum chiah an la awm a, Manchester United, Liverpool leh Chelsea an ni - club ropui pathum kianga an hming ziak kai turin City-in hun ṭha an nei dawn e.