Podence-a'n Olympiakos a zawm

Wolverhampton Wanderers forward Daniel Podence chuan Premier League club-ah kum 2025 thleng khel a, a ṭul dan a zira cham chhunzawm turin contract a ziak - mahse, loan-in a chhuak nghal bawk!

Podence hian a club hlui Olympiakos chu season khat chhung atan loan-in a zawm. Kum 27 mi Podence hian January 2020 khan Greek club aṭang hian Wolves hi pound maktaduai 16.6-in a zawm.

Wolves tan match 105 khel hmanin, goal 16 a khungsak a, 2019-20 season-a Super League Greece-a a champion pui Olympiakos lamah a kir leh ta a ni.

Wolves sporting director Matt Hobbs chuan, "Daniel hian thil thar hmachhawn a duh tih hi zep tur a awm lo. Tun hi a tan chuan European football thlenga a lo khelh tawhna club-a kirna remchang a ni a, a beisei anga thil thleng tur chuan contract a ziah thar a ṭul tih pawh a hrethiam êm êm a ni," a ti.

Hobss chuan sawi zawmin, "Daniel hi lo kirin, kan club tan pawh a la khel leh mai thei. Mahse, tun hi a tan chuan chhuah hun ṭha tak a ni," a ti a, an club-a a lo kir leh chungchang chu player kutah thui tak a innghah thu a sawi bawk - Olympiakos hian Europa League an khel dawn.

Wolves hian tun season-ah player pakua ngawt chu loan-in an chhuahtir a, player pariat an hralh bawk - an league match hmasa pali aṭanga point thum chiah hmuin, table-ah 15-na an ni mek.