Anderlecht-ah Schmeichel a lut

Football khawvel barakhaih a, Premier League-a Leicester City champion puitu goalkeeper Kasper Schmeichel chuan Belgian club Anderlecht a zawm a, kum khat chhung khel turin contract a ziak.

Kum 36 mi keeper hian kar hmasa lawk khan Ligue 1 club Nice a chhuahsan a, French club nen hian inhriatthiam tawnnaa an inṭhen avangin Anderlecht hi free transfer-in a zawm thei a ni.

Denmark goalkeeper Schmeichel chuan, "Anderlecht hi club lian tak an ni a, hmun hrang hrang aṭanga player ka khelhpui tawhten an fak êm êm bawk - chuvang chuan he hmun pan ve hi ka châk tlat a ni," a ti a, Belgian club a zawm chhan a sawi.

Schmeichel hian season hmasa ṭan dawn khan Foxes aṭangin Nice hi a zawm a, inelna hrang hrangah match 46 zet a khelhsak hnuin a chhuahsan leh ta a ni.

Danish keeper hian King Power Stadium-ah kum 11 hun a hman chhungin match 479 a khel a, Premier League, FA Cup leh Community Shield a chawipui - a club khelhna ngaihtuahin a hnathawh hi a ropui hle.

Belgian club lar Anderlecht hian player langsar kawl an nei nual a, tlarhmaah Schmeichel nena Denmark tana khel dun Kasper Dolberg neiin, Tottenham Hotspur defender hlui Jan Vertonghen chu captain a ni.

Anderlecht hian Belgian league khelh mekah match ruk khel tawhin, vawi khat chiah an la tlawm a, hmahruaitu K.A.A. Gent nen an point hmuh zat inang mah se, match khatin an khel tam thung.