Terina te an inkhel leh lo!

AFC Asian Cup Under-23 2024 qualifier-ah India Under-23 chu nimin khan inlan tura tih ni mah se, an hmachhawn tur Maldives chu hun tepter tawh takah an inhnukdawk a, India hi an inlan leh lo!

Blue Tigers squad-ah hian Mizoram rawlthar Lalrinliana Hnamte leh Ayush Chhetri te an tel a, mahse, Maldives an inhnuhdawh leh takah chuan an match hmasa ber khel turin India hian an nghah leh hret a ngai dawn a ni.

Maldives hian China-a inelna hmachhawn turin an ram sorkara Ministry of Youth, Sports & Community Empowerment-ah suma ṭanpuina an dil a, mahse, an beisei anga an hmuh theih loh avangin an khawtlai. Sorkar puihna tel loin an mamawh ang zat sum nei thei mah se an tlai hret a, match khelh hun sawn dil mah se India lamin group match zawng zawng sawn vek law law an duh avangin a rem ta lo a ni.

Blue Tigers boss Clifford Miranda chuan, "Kan tan engmah a inthlak danglam phah lo a, Maldives hmachhawn ta ila, ti tura kan inbuatsaih ang thoin kan kal ang. A ṭha thei ang bera khelh a, kan theihna sang ber kan hlan a la ṭul reng a ni," a ti.

Miranda chuan sawi zawmin, "A êng zawnga thlir chuan team kan nih angin training hona hun kan nei tam thei dawn. China zinkawng a hautak a, ka nauten taksa leh rilru hahdamna hun an neih tam phah sawt dawn bawk," a ti a, a êng zawngin a thlir.

India coach chuan Maldives an tawng lo tur erawh pawi a tih thu sawiin, "Maldives hmachhawn ta ila, China leh UAE hmachhawn hmaa insiamremna remchang a ni dawn. Maldives hi hautak lo ber tura kan ngaih a nih avangin kan tan chuan inpuahchahna ṭha tak tur an ni.

"Tunah chuan a harsa lehzual sawt dawn a, mahse, Maldives awm pawh ni se, China leh UAE kan hmachhawn chu a ngai dawn tho alawm. Chuvang chuan kan tum chu a la ngai reng a, Asian Cup 2023 khelh kan tum ang," a ti a, UAE leh China hneh a tum.

–––––––––––––––––––––––––––––––––––

India Fixture

September 6, Nilaini

India 02:00 PM Maldives

*Maldives an inhnukdawk

September 9, Inrinni

China 5:05 PM India

September 12, Thawhlehni

UAE 2:00 PM India