Premier League club-te an vil uluk dawn

Covid-19 vanga hun rei tak Premier League khelh theih a nih loh hnuah club-te training phalna pek an ni a, amaherawhchu dan an zawm em tih uluk taka endik an ni dawn. GPS tracking leh video analysis hmangin club-te training dan enfiah a ni dawn a, thuneitute hian club training hi ṭhawn thut an tum bawk.

Thawhlehni khan insi si loin mi tlem zawk a huhoa training ṭan a ni a, league-a director of football Richard Garlick chuan,"Training ground tinah dan an zawm em tih endik a ni ṭhin dawn a, club-te hi kan tlawh hun tur hi kan hriattir dawn lo," tiin an inṭhawn thut ṭhin tur thu a sawi.

Mi tlem zawk tih hian training-naah panga aia tam phal a ni lo a, session khat hi minute 75 aiin a rei thiang lo. Hetia ruahmanna fel fai taka siam a nih rual hian dan zawm turten an tih tur an la hre chiang lo niin BBC zirchianna chuan an tarlang.

BBC zirchiannaah hian Premier League leh English Football League-a doctor leh physiotherapist-te a zawtfiah a, an thawh tur leh an mawhphurhna an la chiang tawk lo. Ruahman dan chuan inelna ṭan hun atan hian June 12 a ni a, tun dinhmuna a lan dan chuan tawlh hnun leh hret pawh a ṭul thei ang.

Premier League chief executive Richard Masters chuan, "June 12 hi ruahman dan chauh a ni a, thutlukna nghet bur erawh a ni lo. Chutihrualin inelna ṭan hun tura ruahman tawh thlak sek hi kan duh dan a ni lo. Eng emaw chen hi risk lak a ṭul dawn a, him taka training neih hi kan hna hmasa a ni," tiin a sawi.

Europe-a inelna lian zinga mi Bundesliga chu kar liam ta khan ṭan a ni a, inelna ṭan hma hian kar nga chhung insi loin training an nei tawh a ni.