Deeney-a'n training a zawm duh lo

Watford player pakhat leh staff pahnihin Covid-19 an vei tih hmuhchhuah a ni a, captain Troy Deeney chuan he thu a hriat hma hian training zawm a tum loh thu a puang. 

Premier League chuan inelna chhunzawm tumin hma a la a, Thawhlehni aṭang khan player insi loa training an 

ṭan. Deeney hian training a zawm duh loh chhan hi a chhungte hriselna a ngaih pawimawh vang a ni a, Watford captain thutlukna hian Premier League ṭan tura ruahmanna a tih ṭhuanawp theih dan kawng a awm.

Office for National Statistics zirchiannaah England leh Wales-a mi ngo aiin BAME (black, Asian and minority ethnic) te chu a letin Covid-19 vangin an thi awlsam a, a let liin an kai awlsam tih an hmu chhuak. BAME hi mihang, Asian leh hnam hnuai hnung lam sawina a ni a, heng mite tan chuan coronavirus hi a hlauhawm lehzual tihna a ni.

Kar liam ta Nilaini khan Premier League-in club captain leh medical expert a ko a, Project Restart chungchangah meeting an nei. Kum 31 mi Deeney chuan, "Meeting-naah zawhna awlsam ka zawt. BAME-te hi zirchianna aṭangin an dinhmun a derthawng a, uluk zawka endik an ni dawn em? lung dinhmun enfiah a ni dawn em? ka ti a, min chhang thei lo. 

"July thla chanve thleng lu kan la met thei lo a, chutih laiin box chhungah player 19 nen ball tauh tumin kan inchuh dawn. Ka zawhna zawh min chhan theih loh chhan hi an duh loh vang lam a ni lo a, a chhan dan tur an hriat loh vang a ni. Ka zawhna min chhan theih loh chuan risk lak a ṭulna ka hre lo," tiin a sawi.

Deeney fapa hian thawk lamah harsatna a nei a, Watford captain-in thutlukna huaisen a siam chhan hi an chhungkaw himna atana a tih a ni. Watford striker chuan, "He natna kai tur hian kan training-naah pakhatin a vei chuan a tawk a. Covid-19 hi kan chhungkuaa kenluh ka hreh a ni. Ka fapa thla nga mi hian thawk lamah harsatna a nei a, a dinhmun hi hlauhthawma dah ka duh lo," tiin a sawi.

Watford manager Nigel Pearson chuan player-te hi training tura a tihluih loh tur thu a sawi a, Deeney hian tun dinhmunah chuan club lam aṭangin hremna an dawng dawn rih lo tihna a ni a. Khawtlang media tarlan danin Deeney bakah hian Watford player engemaw zatin training an zawm duh lo niin an sawi bawk.