Football pawhin entu a nei thuai ang - UEFA president

UEFA president Aleksander Ceferin chuan Covid-19 vanga zan tam a mut theih loh thu a sawi chhuak a, football-in entu a neih thuai a rin thu a sawi lang bawk.

Covid-19 vanga football dinhmun sawiin Ceferin chuan, "Hna thawh tur tam tak a awm a, kar liam ta khan thla hnih chhunga a vawi khat nan Switzerland-ah (UEFA hmunpui) meeting nei turin ka kal. 

"Thu thar hriat tur tam tak a awm a, inkhel tam tak khelh theih a ni lo a, pawisa tam tham fe hloh a ni a, hemi avang hian zan tam tak ka mu thei lo. UEFA dinhmun hi hlauhthawnawm a ni lo a, amaherawhchu club leh league-te bakah sum thawhtute hi kan ngaihtuah a ni," tiin a sawi.

UEFA president chuan sawi chhunzawmin, "Kan dinhmun hi a khirhkhan hle. Chutihrualin Covid-19 pawhin tlakhniam lam a pan a, thil awm dan kan hrefiah chho zel a, mimal takin a êng zawnga thil thlir ṭhin ka ni. A thim zawnga thlir chuan hun khirh zawk a thlen te an ring a, mahse kei chuan heti zawnga thlir hi ṭha ka ti lo. 

"Awmze nei loa hlauhthawn chiam hian kan harsatna min sut kiansak lo a, thuneitute thu kan zawm hi a pawimawh. Dan kan zawm ṭha a nih chuan tun hma angin football pawhin entu a nei thuai ang," tiin a êng zawngin a thlir.

Caferin chuan, "Indopui pakhatna leh pahnihna vangin football a tlukchhiat phah lo a, Covid-19 pawhin a ti chhe lo ang," tiin Covid-19 zawhah football a ropui ngaia a ropui a rin thu a sawi.