Chhun pachangah Police Vs Aizawl FC

Zote Toyota MPL10-ah vawiin chhun dar 11:00 hian Mizoram Police FC leh Aizawl FC te an inkhel dawn a, club lian pahnih inkhel tur a nih avangin a hmuhnawm ang.

I League club hi coach Victor Lalbiakmawia'n a la ho thei dawn lo a, club academy coach B. Malsawmzuala hoin an khel ang. Sawmtea hian round 3-ah AFC hi a ho tawh a, Venghnuai nen 1-1 in an inhnehtawk.

I League club hian match hmasa bera Electric Veng an hneh hnuah chak hmel an hmu leh tawh lo a, pressure an nei tawh. Chak mamawh lai takin team ṭha Mizoram Police an hmachhawn dawn.

Police hian match hnuhnung berah Project Veng FC an draw hram a, chak an mamawh ve tho. Coach Lalbiaksanga Colney-in Malsawmfela a la ring reng a, AFC coach tan Sawmfela hmachhawn thiam defender thlan thiam a pawimawh ang.

Aizawl FC squad a chhah ṭha a, player thlan tur an ṭhahnem. Hei hi AFC chakna a nih rualin playing XI-ah match fitness nei lo an awm leh ṭhin. Kumin I Day Football semifinal-ah AFC rinkai zawk an ni a, Lalmuanawma (Munez) goal hmangin Police an hneh. Tunah erawh rinkai zawk an awm lo a, inkhel nung ṭha a beisei theih ang.