Mizo naupangte dinhmun chinfel ni

Hero Sub Junior Boys' & Girls' National Football Championship-ah vawiin hian Mizoram mipa leh hmeichhe dinhmun chinfel a ni dawn. Vawiin hi group match hnuhnung ber a ni dawn a, group khat aṭangin pakhat chauhin semifinal an luh dawn avangin Mizoram team pahnih hi tla thei ve ve an ni.

Mizoram mipa team hian Malda, West Bengal-ah tukin zing dar 9:00 hian Odisha an hmachhawn dawn. Group C-ah Mizoram leh Odisha te chauhin beisei an nei tawh a, coach HC Zarzoliana hote hi an goal difference a ṭhat zawk avangin draw a tawk.

Mizoram hmeichhe team hi Amritsar, Punjab-ah an inkhel thung ang. GN Stadium-ah Mizoramin anmahni ang bawka point ruk hmu tawh inelna thlengtu Punjab chu vawiin tlai dar 4:30 hian an hmachhawn dawn.

SYS coach pahnih R. Lalnunsangi leh Lizzy Lalhmingsangi te enkawl team hi goal difference an neih ṭhat avangin draw a tawk a, amaherawhchu draw pawh hi a harsa dawn. Mizo hmeichhe naupangte hian Uttarakhand (13-2) leh Bihar (6-3) te an hneh tawh a, match hmasa pahnih ang thoin huaisen takin Punjab hi an hmachhawn a ṭul dawn a ni.