US OPEN : Alcaraz tan Zverev a nem hret!

Thahrui a ngah a, a rilru a huaisen bawk - Carlos Alcaraz hi a kum naupan anga teh chi a ni lo, nimin zing khan Alcaraz hian Alexander Zverev chu 6-3, 6-2, 6-4 a hnehin US Open semifinal a inhlangkai.

Inkhel dangah Daniil Medvedev chuan Andrey Rublev lakah 6-4, 6-3, 6-4 in hnehna a lo chang ve bawk. Russian tlangval Medvedev leh Alcaraz ten final luh an inchuh leh dawn, inkhel a hmuhnawm khawp ang.

Semifinal leh lamah Novak Djokovic leh tualchhung tlangval Ben Shelton te an intum dawn bawk a ni. Hard court inelna lian US Open hi September 10, Pathianni zanah a hmawr bawk a ni dawn.

Zverev a chau

Alcaraz leh Zverev te intawn hnuhnung chu kumin tir lama khelh Madrid Open a ni a, hetihlai hian Zverev hi a hliam damna a la rei loh avangin a ṭhat dan takin a la khel lo, tunah erawh a ṭhat dan takin a khel thei tawh thung.

Mahse, world number 1 Alcaraz lakah Zverez a che thei lo. German tlangval hian quarterfinal thleng tur hian a match hmasa lamah darkar 15 chuang a khel a, last 16 bikah phei chuan darkar nga deuh thaw a khel hial.

Hetihlai hian Alcaraz erawhin a match hnuhnung berah hun a mamawh tam lo a, match nga a khelh chinah set khat chiah a hloh - harsatna lian tham a la tawk lo a, nuamsa deuh takin a chak zel tihna a ni.

Seeded 12-na Zverez hian set hmasa lamah a service a hum theih loh a tuar a, set hnuhnung ber an khelh dawnah hliam tenau vanga enkawl lailawk niin, hei hian Alcaraz kaltluang tinep deuh mah se a dang zo ta chuang lo.

Champion lai

Carlos Alcaraz-a'n sulhnu ṭha a hnutchhiah zel, hranghlui Johan Kriek (1978-1980) hnuah US Open khelh hmasak pathuma quarterfinal emaw, a aia sang emaw thleng zawn thei leh hmasa a ni ta hial.

Kum 20 mi Alcaraz chuan, "New York khawpuia inkhelh hi nuam ka ti a, a bik takin Arthur Ashe Stadium hi ka tan chuan hmun nuam tak a ni. Stadium chhunga ka luh hian ka thla a muang a, taksa leh rilru hian inkhelh a cho zak mai a ni," a ti.

A chak lo zawk Zverev chuan, "Cincinnati Masters-ah Novak nen kan inkhel a, tunah Carlos nen kan inkhel leh a ni a, tun dinhmunah chuan anni pahnih hi midang chunga leng an ni," tiin player pahnih an dahsang thiam hle.

Theihna nei sang tak nei mah se Zverev hian Grand Slam nomawi a la chawi lo chhunzawm zel a, major title hmasa ber la tur pawhin season thar a nghah leh phawt a ngai dawn tihna a ni - nakkum January thla chawhnu lamah Australian Open an khel ang.

Khaw lum karah

New York khawpuiah khua a lum hle - Nilaini zana khaw lum lam chu 35C a tling hial. Russian tlangval pahnih Medvedev leh Andrey Rublev ten khaw lum leh boruak hnawng vangin inkhelh harsa an ti hle.

Seeded pathumna Medvedev chuan, "Inkhelh a harsa takzet, keimah chauh ni loin ka ṭhianpa Rublev tan pawh khan a harsa. Set khatna kan khelh zawh meuh kha chuan ball boy te kha ka hmu phe deuh ruai tawh," a ti.

Russia hi ram vawt a ni a, Europe ramah pawh a vawt zinga mi a ni - an tan US chu a lum mah mah. Thawk lama harsatna a neih avangin Medvedev hi enkawl lailawk a ni hial, a tawp thleng erawh chuan a khel thei ta tho.

World number 8 Rublev a vanduai ṭhin - Grand Slam quarterfinal vawi kua a khel tawh a, a chak lo zawkah a ṭang vek. Tun ṭuma a hneh loh Medvedev hi naupang an nih lai aṭanga a ṭhianpa niin, kum ruk mi lek an nih lai aṭangin an lo inhmachhawn tawh ṭhin.