Chhinga Veng an tho chhuak e

I Day Football champion Chhinga Vengin Zote Toyota MPL10 match thum chak hmel an hmuh loh hnuin nimin tlai khan FC Venghnuai 2-0 in hneh. Chhingcows tan hian A. Vanlalremruata leh Suanngaihmuana ten goal an khung.

MPL club pathum champion pui tawhtu Lalsangzuala Hmarin pressure a nei hman a, amaherawhchu pressure sangah an theihna a lang chhuak. Remruata hian Venghnuai keeper Lalchhanchhuaha Sailo ball thlauh chu minute 26-naah a ti goal a, Amuana'n minute 69-naah Venghnuai offside trap bumin a ti goal leh bawk.

Injury time-ah substitution tihsual vangin Chhunga Veng hi player 12-in an khel a, minute khat velah hriatchhuah lehnghal niin inkhel an titawp. Venghnuai an khel zui ta lo.

FIFA Laws of the Game (Law 3 - The Players)-ah chuan player 12-a an khelh chuan inkhelh tihtawp a, player an tamna kha chhuahtir a, drop ball emaw freekick emaw hmangin inkhelh zui leh mai tur a ni.

Amaherawhchu, Venghnuai lamin an khelh zui duh tak loah chuan khelh zui theih a ni tawh lo a, minute 90 an khelh tlin tawh tho avangin Chhinga Veng hi 2-0 a chakah an puang.

Thil thlen dan tak chu minute 87-naah Chhingcows-in player pahnih thlak an tum a, bench aṭanga lut tur Roben-a mawza bun thuahna rawng a inang lo. Roben hian mawza dang a zawng leh a, a in bun fel hnuah fourth official-in a thlak tur player kha chhuak tawhah ngaiin a luhtir.

Chhinga Veng hi player 12-in an khel tih hriat chhuah thuai a ni tho a, Venghnuai lamin an hrethiam thei ta lo thung. Thil thlen dan hi match official ten MPL Board hnenah an thlen ang a, inelna thuneitute hian thutlukna an siam ang.