Sergio Ramos an lo lawm

Sergio Ramos chu a inzir chhuahna Sevilla-ah a kir leh ta a, Spanish club hian an defender hlui hi ropui takin an lo kuangkuah - defender rorum leh luhlul tak Ramos pawhin lawm avangin a mittui a dang zo lo hial a ni.

Ramos hian Sevilla aṭangin Real Madrid a zawm a, nomawi chawi theih ang zawng zawng a chawi hnuah Paris Saint Germain a pan. Paris club a zawm hnu hian hliam vangin a buai fo a, beisei a phak zui ta lo.

PSG nen season hnih hnuah an inṭhen a, tunah chuan football hun hnuhnung lam hmang turin a bul ṭanna Seville khawpui bawk a pan leh ta a ni, a chawrchhuahna khawpui hian an lo la theihnghilh lo a ni.

Kum 37 mi Ramos chuan, "A nihna takah chuan Sevilla leh Madrid ka hmangaih a, tunah chuan ka hmangaih hmasa tan ka khel leh dawn. Madrid khawpuia inkhel tura ka kal hunah pawh ṭha taka min lo dawnsawn ka beisei," a ti.