A tawpah Electric Veng an chak

Zote Toyota MPL10-ah Electric Vengin chak hmel an hmu ta a, nimin chhun khan hun tawp hma hreta Thangroṭhuama goal hmangin Project Veng FC 2-1 in an hneh.

Kolasib club Project Vengin Mizoram Police laka point an hlawhchhuah zawh chiahah an elpui Electric Veng an hneh lo a, match li aṭangin point khat chauh an la hmu.

MPL kaithar Project Veng hian 1st Bn MAP Ground-ah bul an ṭan ṭha a, chance pawh an insiam hnem. Mahse, tlarhma lama awm Lalkrawsmawia a hriam tawk lo.

Electric Vengin bul ṭan ṭha lo mah se tha an thlah duh lo a, injury time-ah F. Lalrammuana'n a tauh goal. Goal khungtu Rammuana leh a cross-tu Lalbuatsaiha te an fakawm hle.

Second half-ah Electric Veng an insiamṭha zui a, chance erawh a tam hran lo. Goal khungtu Rammuana'n penalty a hlawh chhuak a, Samuel Lawmsiamkima'n goal zawnah a pet lo.

Project Veng an phur phah a, an beisei ang penalty pek an ni ve ta. Minute 72-naah Jehova Lalthangsanga'n goal kilah a pet a, EFC keeper V. Lalthlamuanpuia'n ring dik mah se a dang thei lo.

Team pahnih hi point thum hmuh tumin an innawr chhunzawm a, a tawpah Project Veng an vanduai ta zawk. Injury time-ah Rammuana cross chu Ṭhuama'n chakna goal khung nan a hmang.

Electric Veng tan tlarhmaah Rammuana a khel ṭha a, chutihrualin tlarhnung bang rinawm Remlalfaka hnathawh hmuh hmaih a ni lo. Remlala hi man of the match-a thlan a ni.