Silly Point : SUPER SUNDAY

Pathianni tlai dar 2:30 a lo ri ang a, Sri Lanka khawpui Colombo-a R Premadasa Stadium lamah khawvel mit a fu fur tawh ang. Asia Cup 2023 Super 4 ( Semi Final League) ah India leh Pakistan captain Rohit Sharma leh Babar Azam ten ṭhum vawr turin khelmual laili an pan tawh dawn a ni. Tin, tuna Sri Lanka khawchin han thlir leh Premadasa Pitch lo khawsak ṭhin dan thlirlet hian, thumvawra vannei zawk zawk captain chuan an tumpuite vaw hmasa turin an tirh a rinawm.

Indo- Pak (Round 2)

India tana a khelh ṭhin laia vawi duai lo World Cup thlenga Pakistan lo hmachhawn tawhtu, Robin Uthappa chu Silly Point lam chuan be pawpin a tawnhriat te tiang hian min hlui, "Pakistan nena inkhelh dawn hi chuan, a hma boruak zawk hi a inkhel chhung boruak ai mah hian a rit ṭhin a, eng stage-ah pawh intum dawn ila, mimal leh team ang pawh hian kan duh emaw duh lo emaw mi hi a nghawng ve hrim hrim a, hei hi chu khawvel awmchhunga thil awm tur a ni. Hetah tak hian a inkhel tura te rilru leh game plan lo inpuahchah lawkna te hi a pawimawh zual ta ṭhin a, khelmual chhunga inkhel tura kan luh tawh erawh hi chuan, a engmaw zawng takin pressure kan ti hi a bo deuh vek tawh zawk a, a player-te lah inhrechiang sa, tawng inang hmang, hindi a inbia a, infiam bawrh bawrh vek kan ni ṭhin," a ti.

Infiamna infiamna ni silo

Nomawi i chawi lo mai thei, in champion lo thei, mahse Pakistan hneh loh erawh kan hrethiam thei lo tih hi India fan-te hmakhawsang atanga an dan dinglai a ni a, chutiang bawkin India hneh loh hi Pakistan tan chuan tawrh theih loh khawp vanpui chimna hun ang a ni ṭhin; pathian tluk meuha an lo biak thin Sachin Tendulkar a runhmun meuh pawh suasam loh tawh tawh ṭhinna leh, Pakistan mi ropui Wasim Akram a nupui fanau venhim an lo ngaih tawh ṭhinna inkhel a ni tlat.

Technical

Premadasa Pitch hi Spinner-te chan ṭhatna hmun khelmual zau lem lo tak a ni a. Batsman ding nghet tawh laklawh tan erawh runs tamtak an lo vuak chhuah tawhna tualzawl a ni. Zep thu a cheng lo, India-in spinner an nei ṭha zawk a, veivawm pahnih Kuldeep Yadav leh Ravindra Jadeja te hi Babar Azam leh a hoten an lo zir lawk fe dawn tih a chiang.

Pakistan ball ṭhuai vir thiam pahnih Shadab Khan leh Md Nawaz te erawh Rohit Sharma leh a hote tan chuan mut han titui lo lutuk tura hlauhawm angin lang lo mah se, an khelh fuh nia chuan tawrhlelawm ve tak a ni a, chutirual chuan Pakistan Fast bowler-te hi eng ang pitch pawh hmachhawn se, tumpuite zun ti chhuak sek khawpa tawrhlelawm an ni tih erawh tlang hriat a ni.

Kum te a lo ral a, hmana Virat Kohli kha a ni ta chiah lo nge? hun engmawchen chu a reh ve ta deuh a, mahse hetiang ang hun pawimawh leh sangah chiah hian mi naran leh mi bik danglamna tihlan thinna hun tha a ni tih erawh Kohli a hian a hai hauh lo ang.

India Batting leh Pakistan Bowling Indona a ni leh dawn chiang a. Chutirual chuan Babar Azam a ni a rawn inher fuh erawh chuan, cricket khawvelah hian tuma tihdin theih loh khawpa talent nei ṭha a ni tih chu kan hre sa vek awm e. Imam Ul Haq leh Md Rizwan a te form that lai lo ni bawk nen. Jasprit Bumrah tan match fitness test diktak a ni ngei tawh anga, India lam Mohamed pahinih Siraz leh Sami ten, World Cup Squad a an telna chhan hi tihpalh a nih loh zia khawvel hmuha an tihlan hun remchang a ni ngei bawk ang.

Tah chuan

Oscar dawng khawpa film lar Glaidiators-ah khan, Marcus Aurelius a chuan, a changtupa Maximas-a'n Colessium a luh hmasak ber hma khan, "Mipui hi hneh la, i zalenna chu i chang a ni mai," tiin a fuih a nih kha.

A chang hi chuan India leh Pakistan intum hi chu, a engpawh chu a hmar bawkna leh result lo ni ta se, superstar thar hi a rawn hring chhuak ṭhin hian ni berin ka hria. Ishan Kishan, Shubman Gill a ni thei - kum 20 Val Nasheem Shah pawh a ni daih thei.

Heti hian ka khar mai nang e. Mipui hneh i tumpuite hneh la, ropuina bu ah chuan i damchhungin i hming thailang ve rawh le.

Thil pakhat erawh a chiang, kei zawng tun Pathianni tlai dar 2:30 a rik tawh chuan, TV hma a ka ṭhuthmun aṭangin ka che sawn mai mai tawh kher lo ang.