Kopa Trophy dawng thei an hraw

Kum 21 hnuai lam player ṭhate hnena pek ṭhin Kopa Trophy dawng thei tur player 10 hming chhawpchhuah a ni a, award dawng thei zingah Jude Bellingham, Jamal Musiala, Eduardo Camavinga, Pedri, Gavi leh Rasmus Hojlund te hming a awm avangin award-in ngaihven a hlawh lehzual.

Bellingham hian season hmasaah nomawi chawi nei lo mah se Borussia Dortmund tan season hman zawh takah khan match 42 khela goal 14 khungin, assist vawi sarih a nei a, a thawm a lian hle.

Manchester United striker thar Rasmus Hojlund-a'n season hmasaah Atalanta tan match 34-ah goal 10 a khung a, Euro qualifier-ah Denmark tan match ruk khelin goal ruk a khung bawk.

Pedri leh Gavi ten La Liga-ah Barcelona an champion pui a, Musiala hian Bayern Munich tan Bundesliga nomawi a chawi bawk. Camavinga hian Copa del Rey nomawi chiah nei mah se, World Cup final khel France team-ah a tel.

Hming langsar ni lem lo Elye Wahi hian season hmasa khan French club Montpellier tan match 33-ah goal 19 a khung a, tun nipuiah khan euro maktaduai 35-in Lens a zawm - Lens tan club record a ni a, French club pahnih indawrnaa player man to pahnihna a ni bawk.

Kopa Trophy hi Raymond Kopa hming chawia phuah niin, Kopa hian kum 1958 khan Ballon d'Or a lo dawng tawh a, vawi khat chu pahnihna niin, vawi hnih chu pathumna a ni thung.