Semifinal-ah Sabalenka a lut

US Open hmeichhe singles huanga semifinal khel tur a hriat kim. Tournament zawh aṭanga world number 1 ni mai tur Aryna Sabalenka chuan Zheng Qinwen hnehin semifinal a inhlangkai.

Nilaini zan inkhelah seeded pahnihna Sabalenka hian Chinese nula Qinwen hi 6-1, 6-4 in a sawp a, tournament khelh laiah hian match nga khel tawhin set a la hloh miah lo, tie break khelh pawh a la ngai miah lo hial.

Belarus nula hi a khel ṭha tluang takzet a, chutihrualain New York khawpuiah hian tun hmain final a la thleng ngai miah lo, a dai ngai loh ram dai tur chuan tualchhung nula Madison Keys a paltlang leh a ngai dawn.

Hmeichhe quarterfinal inkhel dangah Keys hian Wimbledon champion Marketa Vondrousova chu 6-1, 6-4 in a lo hneh ve thung. An rama inelna lianah hian 2017 khan final a lo lut tawh a, tawnhriat a nei ṭha pangngai viau a ni.

Sabalenka chuan, "Ka khel ṭha takzet a, a tir aṭanga a tawp thleng khan sawisel tur awm lo khawpin ka khel chhuakah ka ngai. Mahse, ka hmabak ka hlen ta tihna erawh a la ni lo, tun aia ṭha zawk hian semifinal ka khelh a ngai," tiin a sawi.