Iraq lakah India an vanduai

King's Cup-a an match hmasa berah India an chak lo nghal a, an chak loh danah erawh lawmna tur a awm - Blue Tigers-in an ngam loh hi Asian football-a hming langsar Iraq an ni a, India tlawmna hi penalty-ah a ni!

Team pahnih hi hun pangngaiah 2-2 in an inhnehtawk a, Iraq hi si phurh suttu zawkah an ṭang ve ve a, an goal khung hi penalty aṭanga lut ve ve a ni. A tawi zawnga sawi chuan Asian football powerhouse zinga mi Iraq-in India laka chak turin vanneihna an mamawh.

India hian captain Sunil Chhetri chu a nupuiin nau a neih avangin an hruai lo a, AIFF Player of the Year ni lai Lallianzuala Chhangte chu damlohna avangin a inlan lo bawk.

Chiang Mai, Thailand-a inkhelah India tan Mahesh Singh chuan minute 16-na lekah goal hmahruai a khung a, Abdul Sahal Samad-a siamsak chu a tawih takzet.

India hmahruai chhung erawh a rei lo. Minute 28-naah Sandesh Jhinghan chu a handball a, penalty a chawi - AFC Wimbledon forward Ali Al-Hamadi chuan goal-ah a chantir a, 1-1 a ni.

Goal dang lut loin chawlhlawk hman a ni a, minute 51-naah India bawkin goal an khung - Akash Mishra ball cross chu Iraq keeper Jalal Hasan chuan an lamah a tilut a, inkhel entuten mak tiin an thlir a, Indian football team hmasawnzia an hmu.

Tah hian a la tawp mai lo - minute 80-naah Jhinghan bawkin penalty a chawi leh a, Morocco club ṭha Raja CA striker Aymen Hussein chuan goal-ah a chantir. Hun pek belhah Iraq player, Manchester United academy chhuak Zidane Iqbal chuan red card a hmu a, India tan chhawrna hun erawh a awm tawh lo.

Penalty hmangin chak zawk zawn zui a ni a, India tan a pet hmasa bertu Brandon Fernandes chuan hlahin, Iraq lamin an pet goal vek thung a, 5-4 in India an tlawm.