Tu nge keeper ṭha ber?

Goalkeeper ropui Lev Yashin hming chawia phuah, keeper ṭha ber dawn ṭhin Yashin Trophy dawng thei turin player 10 hming chhawpchhuah a ni a, ngaihdan siam thiam a harsa hle.

Kum 2019 aṭang khan he award hi sem ṭan niin, Liverpool keeper Alisson chu award dawng hmasa ber a ni a, nikum khan pahnihna a ni bawk - kuminah erawh a lang phak lo a, Brazil tana a elpui, Manchester City keeper Ederson a lang thung.

Ederson hi vawi thum award sem tawhah vawi hnih chu top three-ah a lang a, mahse, pathumna ve ve a ni - treble champion a nih avangin tun season-ah dawn chance a sang a, chutihrual chuan Emiliano Martínez a awm ve tlat.

Aston Villa keeper hi a club khelhna aṭanga teh chuan lang phak lo tur a ni a, mahse, World Cup-a Argentina champion puitu keeper a nih avangin dah hniam theih a ni lo.

Lionel Messi-a'n Argentina champion vanga hmingṭhat a hlawh viau rualin, Martinez-a hming lam hmaih a thiang lo - final-a Randal Kolo Muani khung ngei tur nia lang a dan avang ringawt pawh khan a buk a rit viauin a rinawm.