A thiam pahnih chauh an dam ta; Sabalenka hmaah Coco Gauff
US Open hmeichhe final khel tur a hriat ta - tualchhung tleirawl Coco Gauff chuan world number 2 Aryna Sabalenka a hmachhawn dawn. Inrinni zanlaiah nomawi an inchuh ang.
Nimin zing semifinal inkhelah Gauff chuan match point a hmuh pangana hmang ṭangkaiin Karolina Muchova a hneh a, inkhel pakhat zawkah Sabalenka chuan set khatnaah game la ve miah lo mah se Madison Keys a hneh let.
Keys a tlak avangin American player pahnihin final khelh an beiseina a tawp leh ta rih, tualchhung miten Gauff an ṭan rawn dawn - Belarus nula Sabalenka tan tawnhriat a neih tawh hman ṭangkai a ngai ang.
Gauff a puitling
A lar hma avangin tennis ngainatute tan chuan Coco Gauff hi mi thar a ni tawh lo a, chutihrualin kum 19 chauh a la ni tih erawh hriat a ngai. A kum la tlem deuh mah se tun hnai a khelh danah Gauff a puitling tawh hle.
Arthur Ashe Stadium-a inkhelah hian Muchova lakah bul a ṭan fuh a, set khatnaah 5-1 in hma a hruai fal thei a; set hnihnaah pawh 5-3 in a sang fal leh thei bawk, mahse hnehna chang tur tak erawh chuan hna hautak a paltlang a ngai ve ta tho.
Muchova hi a tlawm mai duh bik lo, point khat lek hmu tur pawhin vawi 40 zet ball in pek tawh (rally) te an nei hial a, tun tournament khelh laia rally rei ber a ni hial, a tawpah erawh Gauff a vannei zawk ta a ni.
American nula Gauff chuan, "Nikuma ka inkhelh nen chuan a danglam tawh hle, kawng hrang hrangin nasa takin hma ka sawn tawh. Social media ka khawih tlem a, ka chanchin an sawina ka en tawh ngai lo.
"Mi tam tak chuan ka tih theih loh dan tur leh ka zawh loh tur thil an lo sawi ṭhin a, chungte avang chuan rilru pawh a nghawng ve bawk. Mahse, tunah chuan khatiang thil kha ka kalsan daih tawh a, ka rilru puthmang pawh a danglam tawh a ni," a ti.
US Open inbuatsaih nan hian Cincinnati Masters-ah a champion thei a, hard court inelnaah hian final kalkawngah Iga Swiatek a hneh thei hial, world number 1 Swiatek laka a chak hian inrintawkna tam tak a siamsak tih a sawi bawk.
Sabalenka a chak
Semifinal inkhel pakhat zawkah Aryna Sabalenka chuan darkar hnih leh minute 32 an inkhelh hnuah Madison Keys chu 0-6, 7-6 (7-1), 7-6 (10-5) in a hneh a, a vawi hnih nan Grand Slam nomawi chawi a tum dawn.
World number 1 ni mai tur hian chak turin vanneihna a mamawh tel, set khatnaah game a la miah lo a, set hnihnaah pawh 5-3 a hniamin set thumnaah pawh 4-2 in a hniam zawk, mahse a tawpah erawh tawnhriat nei leh player ṭha zawk a nihna a lantir ta a ni.
Kum 25 mi Sabalenka chuan, "Madison Keys kha a hlauhawm hle a, kawng engkimah hmachhawn a harsa. Beidawng duh miah loin ka bei ngar ngar a, ka ti thei a ni tih kha infuihna a ni reng bawk.
"Kan point hmuh dan hi chhut ula, thil a awlsam lohzia chu inhrethiam mai ang. Tunah chuan final khel turin rilru ka hman a ngai tawh, hna hautak zawk pawh hmachhawn thei ka ni," tiin a sawi a, hun tlemte karah a taksa tihhahdam hman a pawimawh ang.
Sabalenka hian season tir khan Australian Open nomawi a chawi a, season hmasa khan French Open leh Wimbledon semifinal a lut phak bawk - tunah US Open final a lut leh ta, tunlai hmeichhe player ṭha berte zinga mi a ni chiang hle.
A khelh ṭhat tluan avang hian kar thara world ranking chhuak tharah chuan pakhatna a ni tawh dawn. US Open-ah hian champion lai Iga Swiatek chu Jelena Ostapenko hneh loin last 16-ah a zinkawng a lo tawp tawh a ni.