Mizoramin semifinal an lut

Hero Sub Junior Boys National Football Championship-ah Mizoramin Odisha 5-1 a hnehin semifinal an lut. Final khel tur zawnna hi Malda, West Bengal-ah September 10, Pathianni tlai dar 3:00 hian Uttar Pradesh nen an khel ang.

Nimin chawhmaah semifinal beiseina nei pahnih Mizoram leh Odisha te an inkhel a, khelmual a diak bawk nen an intum tawk hle. Goal hmaah Mizoram an vannei a, Mualkhang naupang Henry Lalhnehzova'n hattrick a siam bakah Sialhawk naupang Lalruatdika'n goal hnih a khung bawk.

Mizoramin goal thum an khung hnuah Rema Munda hmangin si phurh an sut ṭhen a, 5-1 in inkhel a tawp. Coach HC Zarzoliana chuan, "Match hmasa bera goal nga khungtu Isaka a inhliam a, a aiawhtu Henry a che ṭha a, ka lawm khawp mai. Ka nauten theihtawp an chhuah a, an inpeknaah ka lawm," tiin Vanglaini a hrilh.

Mizoram hian semifinal lut turin Odisha bakah Kerala leh Maharashtra te an hneh a, group C hmahruaitu an ni. An khingpui tur Uttar Pradesh hi Meghalaya, Karnataka leh SAI te awmna group aṭanga semifinal lut an ni thung.

Mizoram coach Zara chuan, "Semifinal-ah chuan eng result pawh thleng thei a ni. Chutihrualin UP hi group match-a kan khingpuite aiin an nem zawk ka ring," tiin final thlen a beisei thu Vanglaini a hrilh.