Lianzuala'n training a zawm ve ta

Football Association of Thailand buatsaiha neih King's Cup 2023-ah Lallianzuala Chhangte a inlan thei mai thei - Mizo forward hian nimin khan training a zawm a, 100% erawhin a la fit lo.

Lianzuala hi Thailand thlen hnuah khawsik vangin training a zawm thei lo a, nimin khan a zawm ve chiah. AIFF Player of the Year ni lai chuan, "Ka tho nuam ve ta deuh a, training ka zawm ang. Training-a ka dinhmun a zirin, ka khelh theih dawn leh dawn loh chu a chiang chauh dawn," tiin Vanglaini a hrilh.

India hian an match hmasa berah team ṭha Iraq chu hun pangngaiah 2-2 in an inhnehtawkpui a, mahse, penalty-ah Blue Tigers hi 5-4 in an tlawm a, final khel loin pathumna inchuhna lamah an inlan a ṭul phah.

Ningani zan khan inelna thlengtu Thailand chuan 2-1 in Lebanon an hneh a, final an lut - anni hian Pathianni zan dar 7:00-ah Iraq nen champion an inchuh ang a, Pathianni tlai dar 4:00-ah Blue Tigers leh Lebanon an intawng thung ang.

Lebanon leh India hi kuminah vawi thum an intawng tawh a, vawi hnih chu 0-0 a inhnehtawkin, vawi khat erawh 2-0 in Blue Tigers an chak thung - India chak ṭum hian Sunil Chhetri leh Lallianzuala ten goal khat ve ve an khung.

India captain Chhetri hi a nupuiin nau a neih avangin King's Cup khel turin a zin ve lo a, Lebanon lam chuan Lianzuala pawh inlan lo se an duh zawk ang - Bhubaneswar khawpuia duh thala a tlan khum kha an la theihnghilh hman loin a rinawm.

Mumbai City forward Lianzuala chuan, "Ṭawngṭainaah min lo hre reng dawn nia," tiin ngenna a siam a, Mizo forward-in India tan jersey a hak theih nan i ṭawngṭaipuina a mamawh.

Lianzuala bakah hian Mizo defender Lalchungnunga chu India squad-ah hian a awm bawk a, East Bengal defender rinrawl tan senior team-a koh hmasak bera hmun pawimawh chan nghal erawh a harsa - a position-ah Anwar Ali leh Sandesh Jhinghan an awm a, Chungnunga tan a la harsa rih.

Kum 2023-ah Blue Tigers hian match 12 khel tawhin minute 90 chhunga tlawm an la nei lo. Iraq lakah tlawm mah se penalty hmanga chak lo an ni a, Igor Stimac-a enkawlna hnuaiah Indian football team-ten hmalam an pan zel.