Intawn vawi 2-na : India Vs Pakistan

Vawiin tlai dar 3:00 hian R. Premadasa Stadium, Colombo-ah India leh Pakistan te Asia Cup Super 4-ah an inkhel dawn. Super 4-ah hian team pali India, Pakistan, Sri Lanka leh Bangladesh te an awm a, team ṭha ṭhiau an nih tawh avangin tun ṭuma inkhel tur hi chu a pawimawh ta hle.

Pakistan hian Super 4 match hmasa berah Bangladesh an hneh tawh a, India an hneh leh thei a nih chuan final an hnaih nghal dawn. Vawiin tlai dar 3:00 hian Sri Lanka leh Bangladesh an inkhel dawn bawk a, cricket ngainanute beiseina erawh intawn vawi thumna awm se final-ah India leh Pakistan bawk hi inkhel leh se tih hi a ni.

Intawn vawi khatnaah khan Pakistan bowler Shaheen Afridi (wicket li) leh Naseem Shah (wicket thum) te an che ṭha a, India-in 266 runs chauh siamin over 48.5-ah an thi fai vek. Ruahsur vangin Pakistan batter-te an inlar hman lo a, Men in Blue an vannei zawkah a ngaih theih.

Super 4-ah pawh Pakistan an khel ṭha chunzawm a, Haris Rauf (wicket li), Naseem Shah (wicket thum) te zarah Bangladesh-in 193 runs lek an siam. Pakistan batter Imam-ul-Haq (78) leh Mohammad Rizwan (63*) te an che ṭha zui bawk.

India leh Pakistan a nih tawh chuan captain Babar Azam hi mipui mit fukna tur a ni a, player talent nei ṭha bik ni mah se India lakah an che ṭha ngai meuh lo. Chutihrualin Babar Azam che ṭha lo mah se Rizwan, Fakhar Zaman, Imam-ul-Haq te hi buaipui tham an ni tho.

Inkhelhna hmun tur hi Sri Lanka a ni a, Men in Blue hi rinkai zawk an la ni tho. Nepal an hmachhawn ṭumin Rohit Sharma (74*) leh Shubman Gill (67*) ten hna zawng zawng an thawk zo vek. Mahse, India top order-te hi intawn vawi khatnaah Afridi leh Naseem Shah lakah an talbuai a, an insiamṭhat ngei a ṭul ang.

Asia Cup inelna hi India-in an la thutak a, hei aia ngaih pawimawh an la nei. India-in kum tawp hian Cricket World Cup a thleng dawn a, Pakistan hi an hmachhawn leh thuai dawn. Tuna India cricket star rual, ram mipui ṭan rawnte hi Pakistan lakah an zawr a nih ngat chuan an hlutna nasa takin a tlahniam ngei ang.