Vawiinah India U23 inlan dawn

AFC Asian Cup Under-23 2024 qualifier-ah India U23 chuan vawiin tlai dar 5:05 hian an match hmasa ber an khel dawn a, mualneitu China nen an inkhel ang.

Blue Tigers squad-ah hian Mizoram rawlthar Lalrinliana Hnamte leh Ayush Chhetri te an tel a, India hi Nilaini khan an match hmasa ber khel tur ni mah se Maldives an inhnuhdawh avangin an inlan thei lo.

Mohun Bagan midfielder Terina chuan, "Game hi chu sawi lawk a har khawp, China hi kan group-a ṭha ve deuh ber tura kan ngaih an nia, mahse, hneh kan tum khawp mai," tiin Vanglaini a hrilh.

FC Goa midfielder Ayush chuan, "Kan tum anga kan khel chhuak a nih chuan chak theih kan inbeisei ve khawp mai," tiin Vanglaini a hrilh ve bawk.