Mizoram Police ngamtu Aizawl FC

Zote Toyota MPL10-ah Aizawl FC chuan nimin chhun khan Mizoram Police chu Lalrinzuala goal hnih hmangin 3-1 in an lehthal. I League club hian match li aṭangin point riat an hmu ta a, point sarih hmu Police an zuam khum.

Season liam ta khan Aizawl FC hian Mizoram Police hi I Day Football final-ah an hneh lo a, kuminah erawh I Day Football semifinal-ah an hneh. Round 3-ah chak hmel an hmuh loh ve ve avangin nimin inkhel hi a pawimawh a, I League club an ding chang ta zawk.

Mizoram Police coach Lalbiaksanga Colney-in second half-a nawr tumin Malsawmfela a awltir a, a aiah F. Lallawkima'n minute 12-na lekah Lalbiakhlua (Biaktea) ball vawrh chu um lutin goal-ah a chantir a, AFC defender S. Lalhrezuala'n Khawbung tlangval Lawma hi a dang hman lo.

Mahse, minute li hnuah HK Lalhruaitluanga ball pek chu Joe Zoherliana'n chang fuhin dinglam aṭangin ṭha zetin a cross a, vengtu nei lo Lalrinzuala'n a tauh goal. Lengpui tlangval Zohera leh Serchhip tlangval Rinzuala ten an ti ṭha ve ve.

Minute 52-naah Ramdinthara ball vawrhluh ṭha chu Lalbiakdika'n tauh letin Rinzuala'n a petna tur khawp hmunruak a siam hnuah cool deuhin a khung. Police-in Sawmfela luhtir mah se a tawpa scoresheet-a hming rawn nemkai chu KC Larchhuakmawia a ni.

Cherhlun tlangval KC Valpuia hian box chhung aṭangin ṭha zetin a pet goal a, ṭhing ṭhiin van lam a kawk nghal. KC-a hian Aizawl FC-ah khelhna hmun a chang tam tawk lo a, Police lakah chak nemnghehna ni ringawt loa chance pek belh theitu a nih avangin a lawm tih hi chiang hle.

MPL10-ah Aizawl FC an la tlawm lo a, chutihrualin match hnih ngawt an khingpui an draw tawh. Police-in an training-na hmun 1st Bn MAP Ground-ah chak hmel an la hmu lo. MPL-ah chanchin ngaihnawm a awm chho zel e.