Euro 2024 Qualifier : France leh Netherlands an chak
Tualchhung football an chawl a, European football-a ram leh ram inelna sang ber Euro 2024 khel tur zawnna qualifier pawh khelh ṭan a ni leh ta a, Ningani zan khan group ngaihven hlawhah Netherlands leh France ten hnehna an chang ve ve.
European football-a ram lian pahnih hi group B-ah awm ve ve a, group chung lamah an pahnihin an awm mek - group tina a ti ṭha pahnih chu Euro 2024 khel turin an tling dawn.
France hian an mikhual Republic of Ireland chu 2-0 in an hneh a, Aurelien Tchouameni leh Marcus Thuram ten goal an khung a, Netherlands-in an mikhual Greece chu Marten de Roon, Cody Gakpo leh Wout Weghorst goal hmangin 3-0 in an hneh bawk.
Les Bleus an chak
Parc des Princes khelmuala hnehna chang turin France-in harsatna an tawk lo. Real Madrid midfielder Aurelien Tchouameni chuan minute 19-na lekah mawi zetin goal hmahruai a khung a, bench aṭanga luhtir Marcus Thuram chuan minute 48-naah a belhchhawh bawk.
France-in match nga an khelh tawhah hnehna la chang vekin, table chung ber an luah mek a, point 15 an nei tawh - Didier Deschamps enkawl team hian thil mak danglam bik a thleng a nih loh chuan Euro 2024 an khelh ngei a rinawm.
Hetihrual hian Ireland tan erawh hmabak a hautak ta hle - match li an khelh aṭangin point thum chiah an nei a, match li khelh tur an la neihah tlawm a thiang tawh lo ang.
Hei le Gakpo
Liverpool forward Gakpo chuan ram tan pawh innghahna tlak a ni, tih pholangin Greece lakah goal a khung a, Netherlands a chakpui - Atalanta defensive midfielder De Roon-a'n ram tana a goal hmasa ber a khung hnuah Gakpo hian a belhchhah.
Netherlands tan Manchester United striker hlui Wout Weghorst chuan a belhchhah ve leh a, Dutch team an chak chiang hle - Greece tlanpelin table-ah pahnihna an ni a, match nga khelh tur an la neih avangin an ngaih a ngam ang.
Dutch team hian point kua ngawtin hmahruaitu France an phak lo mek a, hetihrual hian match hnih ngawtin an khel tlem mek thung - mahse, Greece tan beisei a la bo bik lo a, inthlahdah a thiang lo.