Argentina chakna Messi

Lionel Messi-a freekick hmangin Argentina chuan Ecuador 1-0 in an hneh a, an nomawi humhim tura an zinkawng hmasaah result ṭha an nei. September 12, Thawhlehni zanlaiah Bolivia an lenchilh leh ang.

Nimin zing Estadio Monumental-a World Cup 2026 qualifier inkhelah Ecuador lamin an goal venhim chu hnapuiah an nei a, hun rei tak chhung pawh an inveng thei a, khualmual aṭangin point khat an hlawhchhuak dawn ni pawhin a lang hman.

Mahse, minute 77-naah Lautaro Martínez chuan freekick a hlawh chhuak a, a pet turin Messi a rawn ding chhuak. Argentina captain hian goalkeeper Hernan Galindez dan phak lohin goal kilah a khung a, point thum hmuh nan a tawk.

Minute 89-naah Messi lakchhuah a ni a, substitute bench aṭangin midfielder Exequiel Palacios a rawn lut thung. Argentina captain an thlak chungchang hian sawi zui a hlawh nghal.

La Albiceleste coach Lionel Scaloni chuan, "Messi khan thlak a duh a, chu vanga thlak chauh chu ka ni. Aman a duh a nih ngawt loh chuan kei chuan thlak a ngaihna ka hre lo," a ti a, a captain hian a taksa a chauh avangin thlak a dik tih a sawi bawk.

Barcelona tana a khelh lai aṭang tawhin Messi hi an thlak ngai lo - Pep Guardiola pawhin Messi chu a thlak ngai lo tih a lo sawi tawh. Hliam vanga thlak a nih ngawt loh chuan, thlak tura luh ai chuan a tir aṭanga khelh loh duh mai mi a ni.

Paris Saint Germain tana a khelh laiin, coach Mauricio Pochettino chuan a thlak a, a lungawi lo hmel a lang nghal. Tuna Chelsea coach ni zui ta Poch-a pawhin a thlak zui ta lo, a kum tam deuh tawh mah se minute 90 inkhelh a la cho hle.

Nimin zing South American ramten World Cup qualifier an khelh dangah Paraguay leh Peru te chu 0-0 in an inhnehtawk a, Colombia chuan an mikhual Venezuela lakah 1-0 in hnehna an chang ve thung a ni.