Saudi bazar an khar - Salah a chhuak lo

Tun nipui transfer-ah sum tam tak nen Saudi Pro League an rawn lang a, European football-a player langsar ber ber sum uchuak taka an thlem luh avangin ngaihven an hlawh a, European football ngainatu tam tak an hlauthawng bawk.

Saudi Pro League hi nimin zing lam dar 2:30 khan transfer an khar ve chauh a, European top five league-te aia an transfer tawp hun a tlai fal avangin club tam tak chu thin thiin an mu lo - chung zingah chuan Liverpool an tel.

Karim Benzema khelhna Al Ittihad chuan Liverpool thiampuipa Mohamed Salah chu pound maktaduai 150-a lakluh tumin an dawr a, mahse, Reds chuan Egyptian forward hi zawrh lai a ni lo, tih sawiin Saudi club dawrna hi an hnar nghal.

Saudi club hian khawvela footballer man to ber ni turin Salah hi an rim leh dawn nia sawi a ni a, £215mtd-in an ngam dawn tih thlengin an sawi. Mahse, transfer bazar khar a ni a, Liverpool fan-te hlauhthawn a thleng ta lo.

Sum a tam

Nipui transfer-a Saudi Pro League club-te sum sen zat hi pound maktaduai 700 a tling hial a, anni aia tun nipui transfer-a sum hmang hnem league chu Premier League, Ligue 1 leh La Liga chiah an ni - free transfer-a an lakluh player langsarte chhiar tel phei chuan an player thlem luh hi an hraw hlawm hle.

Saudi club-in player lei nana Premier League club-te hnena an pek zat belhkhawm hi pound maktaduai 250 a tling a, sum senga an lakluh langsar zingah Manchester City forward Riyad Mahrez, Liverpool captain Jordan Henderson, Wolverhampton Wanderers captain Ruben Neves, Chelsea defender Kalidou Koulibaly leh Fulham striker Aleksandar Mitrovic te an tel.

Premier League player ni lo zingah Paris St-Germain forward Neymar lakluh nan Al Hilal chuan £77.6mtd ngawt an seng a, Ballon d'Or kawl mektu Karim Benzema-a'n Al Ittihad a zawm te pawhin sawi a hlawh hle - Liverpool midfielder Fabinho leh Chelsea midfielder N'Golo Kante te nen an khel ho.

Bayern Munich forward Sadio Mane pawhin Bundesliga-ah season khat chiah hun a hman hnuin Saudi lam a pan a, Inter Milan captain Marcelo Brozovic, Barcelona midfielder Franck Kessie leh Lazio midfielder Sergej Milinkovic-Savic te pawhin Europe-a inelna hmachhawn zui ai chuan Saudi lama sum tam tak hlawh an thlang zawk.

Thleng ta lote

PSG leh Kylian Mbappe inhmuh thiam loh lai khan Al Hilal an lo lang a, Saudi club hian khawvela footballer man to ber ni turin French forward hi an dawr - a man atan £259mtd zet an theh chhuak a, Paris club chuan Saudi club dawrna hi an pawm hman.

Mahse, Mbappe ber hian European football-a inelna hmachhawn a la duh avangin Al Hilal hi inbiakna a neihpui duh lo a, PSG tana a khelhpui Neymar zawk chuan Saudi lam hi a pan - Neymar khelhna club hi Lallianzuala Chhangte khelhna Mumbai City nen AFC Champions League group khatah an awm ho tih theihnghilh lo ila!

Liverpool-in an thiampuipa Salah an chelh thei a, chutihrual chuan thlasik transfer-ah Saudi club-te sum tam zawk nen an lo lang lo ang, tih a sawi theih loh - Salh hian 2024-25 season thleng cham turin contract a nei a, kum 31 mi a ni tawh bawk.

Reds tan match 309 leka goal 188 khung thei hi thlak a harsa ang tih a chiang a, chutihrual chuan a kum a tam ve zel bawk avangin sum tam taka chhuahtir theih a nih laia chhuahtir chu Reds tan a fuh mai thei bawk - tun season-a cham a nih pawhin nakkumah chuan an ṭang zo kher lo mai thei.

SPL zawmtu Premier League Player-te

Al-Ahli: Allan Saint-Maximin (Newcastle), Riyad Mahrez (Manchester City), Edouard Mendy (Chelsea), Roberto Firmino (Liverpool)

Al-Ettifaq: Jordan Henderson (Liverpool), Demarai Gray (Everton)

Al-Hilal: Ruben Neves (Wolves), Kalidou Koulibaly (Chelsea), Aleksandar Mitrovic (Fulham)

Al-Ittihad: N'Golo Kante (Chelsea), Fabinho (Liverpool)

Al-Nassr: Aymeric Laporte (Manchester City), Alex Telles (Manchester United)