Demarai Gray-a'n Al Ettifaq a zawm

Everton winger Demarai Gray chuan Saudi Pro League club Al Ettifaq a zawm a, a man zat hi chiang taka tarlan ni lo mah se pound maktaduai riat bawr vel niin khawthlang media-te chuan an tarlang a, kum li chhung atan contract a ziak.

Gray hi tun hnaiah Everton boss Sean Dyche nen an inhmuthiam lo. Jamaica international hian social media lamah a team a sawisel a, hei hi Dyche chuan hrethiam loin a tawpah chuan an inṭhen ta nge nge.

Kum 27 mi winger hian Fulham zawm a tum a, mahse, club lam hian a duhna an ngai pawimawh tawk lo niin a sawi a, hei vang hian a lungawi lohna a lantir.

Gray chuan, "Khelmual chhung leh pawnah he club tan hian ka theihna zawng zawng ka hlan ṭhin. Tun nipuiah ka chungchang thu sawina tam tak a awm a, inkhelh tam duh mah ila, ka duh angin ka inkhel dawn lo niin a lang," a ti a, hriatthiam theih takin Dyche a dem.

Mahse, Everton boss Dyche chuan Gray hi chhangletin, club thu loa thutlukna siam a ni ngai loh thu a sawi a, Fulham nena an inbiakna a tlawlh khan Gray chuan training a zawm duh lo, niin a sawi bawk.

Gray chuan, "Mihring kan nihna anga min zah lotu tana khelh chu harsa tak a ni," tiin a sawi thung a, Fulham bakah Turkish club Besiktas nen pawh an indawr hman - a tawpah erawh Saudi club a zawm ta thung.

Birmingham City aṭanga inzir chhuak Gray hian Everton tana a khelh hmain Leicester City leh Bayer Leverkusen tan a khel a, Merseyside club tan match 75 khela goal 12 khungin, assist vawi ruk a nei.

Gray-a club zawm thar Al Ettifaq-ah hian Liverpool legend Steven Gerrard chu coach niin, Reds captain hlui Jordan Henderson, Liverpool midfielder hlui Georginio Wijnaldum, Scotland defender Jack Hendry leh Lyon striker hlui Moussa Dembele te an khel bawk.