Messi nena kan inelna a tawp tawh - Ronaldo

Cristiano Ronaldo chuan amah leh Lionel Messi te chuan football chanchin an tidanglam tih a sawi a, player ropui tak ni mah se tun dinhmunah chuan an inelna chu a tawp tawh tih a sawi bawk.

Ronaldo leh Messi hi khawvel player ropui leh hlawhtling berte zinga mi an ni a, mi tam zawk chuan player ropui berah an ngai. Real Madrid leh Barcelona tana an khelh lai phei chuan an chanchin hian sawi pawh a hlawh zual hle a ni.

Kum 38 mi Ronaldo chuan, "Lionel Messi pawh a tum ram lamah a kal a, kei pawhin zinkawng dang ka zawh tawh. Kan awmhmunah ve ve ṭha takin football kan khel chhunzawm a, kan sulhnu erawh chu kan la chhawmnung zel.

"Mi tam takin inhnial nan kan chanchin an hmang ṭhin tih pawh ka hria, kei chuan khatiang thil kha ka ngaina lo. Cristiano Ronaldo an duh avangin Lionel Messi an huat tel kher kha a ngai ka ti lo.

"Messi nen hian season 15 chhung chu huang khatah football kan lo khel dun tawh ṭhin, mipui ten kan pahniha inelna leh inkhel kha an hmu duh ṭhin a, a nuam pawh ka ti ṭhin hle. Mahse, tunah chuan khatiang inelna hunte kha a liam tawh," tiin a sawi.

Ronaldo hian Real Marid tan season kua a khel a, inelna hrang hrangah match 438 aṭangin goal 451 a khungsak hman a, club tana goal khung hnem ber niin nomawi pawh 16 ngawt a hlawhchhuah pui hman hial.

Messi pawhin a vanglai hun ṭha zawng zawng chu Barcelona tan a hmang. Catalan club tan inelna hrang hrangah match 781 khelin goal 674 a khungsak a, club tana goal khung hnem ber dinhmun luahtu a ni bawk.